ԵՐԵՎԱՆ, 19 օգոստոսի. /Նովոստի-Արմենիա/. Երևանում տեղի կունենա հայ ակնառու նկարչուհի Մարիամ Ասլամազյանի «Կյանքի դավթարը» ինքնակենսագրական պատումների ժողովածուի շնորհանդես-վաճառքը, հաղորդում է ՀՀ մշակույթի նախարարության մամուլի ծառայությունը:
Միջոցառումը, որը կազմակերպվում է Գյումրի քաղաքի Մարիամ և Երանուհի Ասլամազյան քույրերի պատկերասրահի հետ համատեղ, տեղի կունենա սեպտեմբերի 3-ին ժամը 14:00-ին Ռուսական արվեստի թանգարանում:
Գրքի վաճառքից ստացված հասույթը կուղղվի Ասլամազյան քույրերի պատկերասրահի բարեկարգմանը։
Մարիամ Ասլամազյանն (1907-2006)իր կյանքը անմնացորդ նվիրում էր արվեստին: Նկարիչն ապրել է մոտ մեկ դար՝ վրձինը ձեռքին, իսկ կյանքի վերջին տարիներին, ի մի բերելով արածն ու չարածը, գրել է «Կյանքի դավթարը» պատումների գիրքը: Մ. Ասլամազյանը, իրեն բնորոշ անկեղծությամբ և սեփական դիտարկումներով վերլուծել է իր ապրումները, պատմել կյանքի դժվարին տարիների ու երջանիկ դիպվածների մասին, անդրադարձել իր ընկերների՝ Մարտիրոս Սարյանի, Սեդրակ Առաքելյանի, Վազգեն Առաջին կաթողիկոսի, Ինդիրա Գանդիի և այլոց հետ հանդիպումների թանկ հուշերին: Հեղինակն իր տեսանկյունից վերանայել է խորհրդային, հետպատերազմյան տարիները և բնորոշել դրանց հետևանքները:
Պատումների գիրքն առաջին անգամ հրատարակվել է 2000 թվականին Մոսկվայում` հեղինակ Մ. Ասլամազյանի միջոցներով: 2016 թվականին «Կյանքի դավթար» ինքնակենսագրականը վերահրատարակվել է:
ԽՍՀՄ և ՀԽՍՀ ժողովրդական նկարիչ Մարիամ Ասլամազյանի ստեղծագործությունների ամբողջական հավաքածուն գտնվում է Գյումրու Ասլամազյան քույրերի պատկերասրահում, իսկ նկարչի ստեղծագործություններն այսօր զարդարում են Հայաստանի ազգային պատկերասրահի, Ռուսաստանի Դաշնության, Չինաստանի, Հնդկաստանի, Ֆրանսիայի՝ շուրջ 50 ճանաչված թանգարանների հավաքածուներն ու մշտական ցուցադրությունները: -0-
Ծանոթացեք լուրերին առաջինն ու քննարկեք դրանք մեր Telegram-յան ալիքում