Կիսին. որքան ապրում եմ ու կամ` կայցելեմ Հայաստան:

ԵՐԵՎԱՆ, 28 դեկտեմբերի. /Նովոստի–Արմենիա/. Աշխարհահռչակ դաշնակահար Եվգենի Կիսինը Հայաստանի նախագահ Սերժ Սարգսյանի հետ հանդիպմանն ասաց, որ որքան ապրում է ու կա` այցելելու է Հայաստան։

Եվգենի Կիսինը Հայաստանում է գտնվում «Երևանյան հեռանկարներ» 18-րդ երաժշտական փառատոնի շրջանակում:

Նախագահը ողջունել է տաղանդաշատ արվեստագետին Հայաստանում, որտեղ, ըստ Սարգսյանի, ոչ միայն գնահատում են Եվգենի Կիսինի տաղանդն ու վարպետությունը, հրաշալի կատարումները, այլև սիրում են նրան մարդկային հատկանիշների համար, սիրում են՝ որպես հայ ժողովրդի բարեկամի:

Նշելով, որ հայ ժողովուրդը երբեք չի մոռանա Եվգենի Կիսինի զորակցությունը 1988-ի երկրաշարժի ժամանակ՝ նախագահ Սարգսյանը շնորհակալություն է հայտնել լեգենդար դաշնակահարին նաև Նյու Յորքում Հայոց ցեղասպանության 100-րդ տարելիցին նվիրված համերգին մասնակցության և բոլոր հայերի սրտերը հուզած՝ Կոմիտասի «Կռունկ»-ի անկրկնելի կատարման համար:
Նախագահը նշել է, որ Հայաստանում մշտապես ուրախ են հյուրընկալելու անվանի արվեստագետին:

Աշխարհահռչակ դաշնակահարն ընդգծել է, որ իր սերն ու պատկառանքը դարավոր մշակույթ և պատմություն ունեցող հայ ժողովրդի նկատմամբ փոխադարձ է։

Դաշնակահար Եվգենի Կիսինը, ում երաժշտական քննադատներն անվանում են Արթուր Ռուբինշթեյնի, Սվյատոսլավ Ռիխթերի և Վլադիմիր Գորովիցի ժառանգորդ, ծնվել է 1971 թվականի հոկտեմբերի 10–ին Մոսկվայում։ Նա բազմիցս ժամանել է Հայաստան համերգներով։ -0-