ԵՐԵՎԱՆ, 23 օգոստոսի. /Նովոստի–Արմենիա/. Forbes ամերիկյան ամսագիրն իր
կայքում հրապարակել է աշխարհի ամենաբարձր վարձատրվող դերասանուհիների վարկանիշը։
Վարկանիշը երկրորդ տարին անընդմեջ գլխավորում է «Քաղցած խաղերի» աստղ, ամերիկուհի Ջեննիֆեր Լոուրենսը, ով տարվա ընթացքում վաստակել է 46 մլն դոլար։ 26–ամյա Լոուրենսն ամենաերիտասարդն է աշխարհի ամենաբարձր վարձատրվող դերասանուհիների տասնյակում։
Forbes–ի վարկանիշում Լոուրենսը զբաղեցրել է առաջին տեղը «Քաղցած խաղերի» (որն աշխարհում է հավաքել է 653 մլն դոլար) վերջին սերիայի վարձույթից ստացված եկամտի և «Ուղևորները» ֆիլմ նկարահանումների համար ստացված կանխավճարի շնորհիվ։ Օսկարակիր Լոուրենսի եկամուտները 2015 թ.–ին կազմել են 52 մլն դոլար։
Աշխարհի ամենաբարձր վարձատրվող դերասանուհիների առաջին եռյակում են նաև Մելիսա Մաքարթին (33 մլն դոլար) և Սքարլեթ Յոհանսոնը (25 մլն դոլար)։
Նախորդ տարի նրանք ևս հայտնվել էին առաջին եռյակում, սակայն Յոհանսոնը զբաղեցնում էր երկրորդ հորիզոնականը (35,5 մլն դոլար), իսկ Մաքարթին երրորդն էր (23 մլն դոլար)։
Առաջին եռյակին հետևում են 47–ամյա ամերիկուհի Ջեննիֆեր Էնիսթոնը` տարեկան 21 մլն դոլարով և 37–ամյա չինուհի Ֆան Բինբինը (17 մլն դոլար)։
Նախորդ տարի Բինբինը, ով մարմնավորել է գլխավոր հերոսուհու կերպարը «Շիկահեր հարսնացուն` Լուսնային թագավորությունից» ֆիլմում, ևս զբաղեցնում էր չորրորդ հորիզոնականը` 21 մլն դոլարով։
Բինբինի հետ միասին աշխարհի ամենաբարձր վարձատրվող դերասանուհիների լավագույն տասնյակում են հայտնվել ևս երկու կանայք, ովքեր ծնունդով ԱՄՆ–ից չեն։ 41–ամյա Շառլիզ Թերոնը, վաստակելով 16,5 մլն դոլար, զբաղեցրել է 6–րդ հորիզոնականը, նա ունի երկքաղաքացիություն։ Շարլիզը և՛ ԱՄՆ–ի, և՛ Հարավաֆրիկյան Հանրապետության քաղաքացի է։ Բոլիվուդի աստղ, 30–ամյա հնդիկ դերասանուհի Դիպիկա Պադուկոնեն 10–րդ հորիզոնականում է` 10 մլն դոլարով։
Forbes–ի վարկանիշում ներառվել են նաև Ջուլիա Ռոբերթսը (8–րդ հորիզոնական, 12 մլն դոլար) և Միլա Կունիսը (9–րդ հորիզոնական, 11 մլն դոլար)։
Աշխարհի ամենաբարձր վարձատրվող դերասանուհիների ցանկի 10 մասնակիցները 2015 թ.–ի հունիսի 1–ից մինչև 2016 թ.–ի հունիսի 1–ն ընկած ժամանակահատվածում վաստակել են ընդհանուր առմամբ 205 մլն դոլար առանց հարկման։ Նրանցից չորսը տարվա ընթացքում վաստակել են ավելի քան 20 մլն դոլար։
Այս տարի կանանց վարկանիշում հայտնվելու անցումային շեմը կազմել է 10 մլն դոլար։ Նախորդ տարի այդ շեմը 6 մլն դոլար էր։
Forbes–ը գնահատում է դերասանուհիների եկամուտները Nielsen սոցիոլոգիական ընկերության և Box Office Mojo ու IMDB կայքերի տվյալների հիման վրա, որոնք հետևում են կինովարձույթներից ստացված գումարներին։ Հաշվի են առնվում նաև գործակալների, մենեջերների, փաստաբանների և հենց աստղերի հարցազրույցների ժամանակ հրապարակված տեղեկությունները։ –0–
