478.82
+0.2
557.59
+7.08
8.14
+0.04
+23
Եղանակը Երևանում
Հայ
Արմեն Թութունջյանի գրքում ներկայացված է հայկական ջազի ողջ պատմությունը
19:56
16 Հունիսի 2015

ԵՐԵՎԱՆ, 16 հունիսի. /Նովոստի–Արմենիա/. Հայաստանի արվեստի վաստակավոր գործիչ, ջազմեն Արմեն Թութունջյանը (Չիկո) երեքշաբթի ներկայացրել է հայկական ջազի մասին պատմող «Ջազը Հայաստանում» հեղինակային գիրքը։

Գիրքն առաջին աշխատությունն է, որտեղ մանրամասն նկարագրված է հայկական ջազի ողջ պատմությունը` սկսած 20–րդ դարի 30–ականներից մինչև մեր օրերը։

352 էջանոց գիրքը հրատարակվել է Երևանում հայկական ջազի 75–ամյակի կապակցությամբ (որը նշեցին 2013 թ.–ին)։ Գրքում ներառվել են բաժիններ, որոնք պատմում են ջազի աղբյուրների, աֆրիկյան արմատների, Արևմտյան Եվրոպա և Ռուսաստան ներթափանցելու, մասնագիտական ջազի առաջացման մասին, ինչպես նաև հակիրճ կենսագրական տվյալներ` հայտնի հայ ջազ կատարողների մասին։

«Անկախ ամեն ինչից, վաղ թե ուշ ես կգրեի այս գիրքը, քանի որ կյանքիս ընթացքում կուտակել եմ հսկայական թվով նյութեր, որոնք վերաբերում են հայկական ջազին, Բացի այդ, ինձ բախտ է վիճակվել դառնալ գրքում նկարագրված բազմաթիվ դրվագների մասնակիցն ու ականատեսը», – ասաց լրագրողներին Թութունջյանը։

Նա նշեց, որ գրքում ներկայացված են նյութեր 57 հայ ականավոր ջազ կատարողների մասին և նրանց միայն մի քանիսի հետ նրան չի հաջողվել շփվել։ «Մյուսները կա՛մ իմ դասախոսներն էին, կա՛մ կոլեգաները», – ասաց Թութունջյանը։

«Խորհրդային տարիներին ջազ երաժշտությունը Հայաստանում հետին պլան էր մղվել, քանի որ երաժշտական կրթությունը կենտրոնանում էր դասական երաժշտության շուրջ», – նշեց նա։

Նրա խոսքով` այդ տարիներին Հայաստանում չկար ջազին վերաբերող մասնագիտական գրականություն, հնարավորություն չկար հանդիպելու օտարերկրյա, մասնավորապես` ամերիկացի ջազմենների հետ, ովքեր իսկական ջազ երաժշտության հիմնադիրներն են։

Այնուամենայնիվ Հայաստանում այդ ժանրը շատ լավ էր զարգացած։

«Հայկական ջազի սկիզբը դրել է հայտնի երաժիշտ Արտեմի Այվազյանը 20–րդ դարի 30–ականներին։ Այդ տարիները համարում են Հայաստանում ջազ երաժշտության ծննդյան տարիներ, քանի որ հենց այդ ժամանակ Հայաստանում պետական մակարդակով ստեղծվեց նվագախումբ, որի  երաժշտական գործիքներն առավել նման էին այդ ժամանակ ամերիկյան և եվրոպական ջազ նվագախմբերում օգտագործվող գործիքներին», – ասաց Թութունջյանը։

Հայաստանում ջազ սկսել են կատարել դեռևս 1920–ականներին։ 1930–ականների սկզբին հայտնվեցին համույթներ, որոնք հիմնականում այդ ոճի երաժշտություն էին կատարում։ Այդ տարիներին առավել հայտնի էր Ցոլակ Վարդազարյանի համույթը, որը ելույթ էր ունենում «Մոսկվա» կինոթատրոնում։ Առաջին ջազ համույթ է համարվում Հայաստանի պետական ջազ նվագախումբը (ավելի ուշ` էստրադային նվագախումբ), որը ստեղծվել է 1938թ.–ին հանրապետության կառավարության կարգադրությամբ։ Նվագախումբը գլխավորում էր կոմպոզիտոր և թավջութակահար Արտեմի Այվազյանը, դիրիժորն էր Ցոլակ Վարդազարյանը։

1950–1960–ականների սկզբին Խորհրդային Հայաստանում մարդիկ սկսեցին հետաքրքրվել ջազով։ Հանրապետության տարածքում ստեղծվեցին ջազ խմբեր, իսկ 70–ականներից Հայաստանի ջազ նվագախումբը հայտնի դարձավ Խորհրդային Միությունում։ Հայաստանի պետական էստրադային նվագախումբը` Կոնստանտին Օրբելյանի ղեկավարությամբ, խորհրդային ջազ համույթներից առաջինն էր, որը հյուրախաղերով եղավ ԱՄՆ–ում։ Խորհրդային հայ երաժիշտները 25 համերգ տվեցին Ամերիկայի մի շարք խոշոր քաղաքներում։

Հայաստանում ջազը հայտնի է նաև այսօր։ Գոյություն ունեն բազմաթիվ համույթներ, որոնք կատարում են տարբեր ուղղությունների ջազ երաժշտություն` Time Report էթնո–ջազ կվինտետը, Katuner ջազ–ռոք սեպտետը` Վահագն Հայրապետյանի ղեկավարությամբ, Chico & Friends քառյակը, ֆյուժն Art Voices երիտասարդական խումբը, Jazzel կանանց համույթը, Ulikhanyan կվինտետը, NooZ քառյակն ու Armenian Navy Band աշխարհահռչակ խումբը` Արտո Թունջբոյաջյանի ղեկավարությամբ։ Հայաստանի առավել հայտնի ջազային երաժիշտներն են Մարտին Վարդազարյանը, Լևոն Մալխասյանը, Վահագն Հայրապետյանը, Արմեն Թութունջյանը, Արմեն Հյուսնունցը, Արմինե Սարգսյանը, Տիգրան Համասյանը, Գարի Քյոսայանը։ –0–

Loading...
Թեմատիկ նյութեր
Բաժնի այլ նյութեր
12:59
19 Հուլիսի 2017
Ռեժիսոր Անդրեյ Կոնչալովսկին «Օսկարը» համեմատել է McDonald's–ի հետ
Ռեժիսոր Անդրեյ Կոնչալովսկին «Օսկարը» համեմատել  է McDonald's–ի հետ և առաջարկել է դրա դեմ պատժամիջոցներ ներդնել ՌԴ–ի կողմից։
19:33
18 Հուլիսի 2017
«Մանկական Եվրատեսիլ-2017»-ին Հայաստանը կներկայացնի Միշան. (ՎԻԴԵՈ)
Միշան «Արցախի ձայներ» խմբի սան է, ով իր «Փոքրիկ Ղարաբաղցի» երգով հասցրել է գրավել մարդկանց սրտերը:
16:46
18 Հուլիսի 2017
15–րդ դարի Հրաշափառ Ավետարանը համալրել է Մատենադարանի հավաքածուն (ՖՈՏՈ)
Ձեռագրի հրաշագործ հատկությունների մասին գիտեին շրջանի բոլոր բնակիչները, այդ թվում` հարևան գյուղում ապրած իր նախնիները։
11:00
16 Հուլիսի 2017
Հայտնի են «Ոսկե ծիրան 2017» կինոփառատոնի հաղթողները (ՖՈՏՈ)
«Ոսկե» և «արծաթե» ծիրանների, ինչպես նաև «Ոսկե ծիրան» XIV միջազգային կինոփառատոնի այլ պատվավոր մրցանակների հանձնման հանդիսավոր արարողությունը տեղի է ունեցել շաբաթ օրը Երևանում։
11:25
15 Հուլիսի 2017
Հայաստանը ներկայացնող Էրիկը` միջազգային երաժշտական մրցույթի մրցանակակիր (ՎԻԴԵՈ)
Հայաստանցի 12-ամյա Էրիկ Մկրտչյանը մասնակցել է «Վիտեբսկ 2017» միջազգային մանկական երաժշտական մրցույթին:
11:19
14 Հուլիսի 2017
«Ոսկե ծիրանը»` բարձր ճաշակի և մարդասիրության գաղափարների կրող
Նախօրեին Հայաստանի նախագահը հանդիպել է «Ոսկե ծիրան» 14–րդ միջազգային կինոփառատոնի պատվավոր հյուրերի հետ։  
16:26
13 Հուլիսի 2017
Երևանի և նրա հանճարեղ երաժիշտների մասին բացառիկ ֆիլմի պրեմիերա` մայրաքաղաքում
Տատյանա Դանիլյանցի վավերագրական-երաժշտական ֆիլմի հայաստանյան պրեմիերան տեղի կունենա հուլիսի 14-ին:
18:58
11 Հուլիսի 2017
Հայաստանը միջազգային մակարդակի ռոք–փառատոն է կազմակերպում
Epic Air Rock Fest 2017–ը կդառնա ռոք–երաժշտության ամենամյա փառատոն, որին կմասնակցեն տարբեր երկրների հայտնի երաժիշտներ։
13:23
10 Հուլիսի 2017
Կինեմատոգրաֆի տոն. Երևանում մեկնարկեց «Ոսկե ծիրան» կինոփառատոնը (ՖՈՏՈ)
Երևանում կիրակի տեղի ունեցավ «Ոսկե ծիրան»  Երևանի 14-րդ միջազգային կինոփառատոնի բացման արարողությունը։
10:15
10 Հուլիսի 2017
Երևանում նոր աստղեր «վառվեցին» «Ոսկե ծիրանի» մեկնարկի շրջանակում
Հայկական կինոյի երեք հռչակավոր գործիչների աստղերը «վառվեցին» կիրակի Երևանում «Ոսկե ծիրան» միջազգային 14–րդ կինոփառատոնի բացման շրջանակում։
14:10
09 Հուլիսի 2017
Նոր «Նինո»-ն` Իվետա Մուկուչյանից ու Արամ MP3-ից (ՎԻԴԵՈ)
Ներկայացվել է «Dashterov» նախագծի ևս մի երգ:
10:45
07 Հուլիսի 2017
Երաժշտական «փոթորիկ» է գալիս Դիլիջան
Dilijan Music Fest խորագրով երաժշտական բացառիկ տոն կանցկացվի առաջին անգամ Դիլիջանում: