ԵՐԵՎԱՆ, 1 հունիսի./Նովոստի–Արմենիա/. Շանհայի միջազգային 22–րդ կինոփառատոնի շրջանակում կկայանա «Սուսերով պար» ֆիլմի համաշխարհային պրեմիերան։ Կինոփառատոնը կանցկացվի հունիսի 15–24–ը։
Այս մասին Facebook–յան իր էջում գրել է ֆիլմի պրոդյուսերներից մեկը` Ռուբեն Դիշդիշյանը` հրապարակելով ֆիլմի պոստերը։
Հայ մեծանուն կոմպոզիտոր Արամ Խաչատրյանի մասին պատմող ֆիլմի ռեժիսորն է Յուսուպ Ռազիկովը, գլխավոր դերակատարն է ռուսաստանցի դերասան Համբարձում Կաբանյանը։
Ինչպես նշվում է «Կինոպոիսկ» ռուսական պորտալում, ֆիլմը ներկայացնում է Արամ Խաչատրյանի «Սուսերով պար» գլուխգործոցի ստեղծման պատմությունը։–0–