ԵՐԵՎԱՆ, 10 հուլիսի. /Նովոստի–Արմենիա/. Երևանում կիրակի տեղի ունեցավ «Ոսկե ծիրան» Երևանի 14-րդ միջազգային կինոփառատոնի բացման արարողությունը։
Կինոփառատոնի բացումից անմիջապես առաջ տեղի ունեցավ ծիրանօրհնեքի ավանդական արարողությունը, որն այս տարի անցկացվեց Երևանի Սուրբ Աննա եկեղեցում։
Կինոփառատոնի բացման հանդիսավոր արարողությունը մեկնարկեց տեսանյութով, որը նվիրված էր վերջերս կյանքից հեռացած`ՀՀ կինեմատոգրաֆիստների միության ղեկավար Ռուբեն Գևորգյանցի հիշատակին։ Փառատոնի մեկնարկին նվիրված հանդիսությանը հաջորդեց 14-րդ «Ոսկե ծիրանի» բացման ֆիլմի՝ Համո Բեկնազարյանի «Խասփուշ»-ի ցուցադրությունը:
Քիչ փայլ, շատ արվեստ
Ինչպես նշեց կինոփառատոնի տնօրեն և հիմնադիր Հարություն Խաչատրյանը, այս տարի միջոցառման շեշտադրումը դրված է ֆիլմերի որակի վրա։
«Հայկական կինոյի զարգացումն այսօր շատ կարևոր է մեզ համար։ Այս տարի մենք հրաժարվել ենք արտիստիկ ատրիբուտներից և նախապատվությունը տվել լավագույն համաշխարհային ֆիլմերի ցուցադրությանը` սկսած Կաննի կինոփառատոնի ֆիլմերից մինչև Բեռլինի և Վենետիկի կինոփառատոնների դափնեկիրները», – ավելացրեց Խաչատրյանը։
Նրա խոսքով, կինոփառատոնի ժյուրիի անդամներն են միջազգային կինոփորձագետներ, որոնց թվում կան բավականին հայտնի մարդիկ։
«Կարևոր բաղկացուցիչ է նաև քաղաքը, որտեղ անցկացվում է կինոփառատոնը, նրա հյուրընկալությունն ու կինոսերները», – ընդգծեց Խաչատրյանը։
Կինոն` որպես մշակույթի հիմք
ՀՀ մշակույթի նախարար Արմեն Ամիրյանն իր հերթին ընդգծեց, որ առաջիկա օրերին երևանցիները կկարողանան ծանոթանալ աշխարհի տարբեր երկրներում նկարահանված լավագույն ֆիլմերին։
Загружается новость ... "Лево"
«ՀՀ կառավարությունը հատուկ ուշադրություն է դարձնում կինոյի զարգացմանը։ Մենք մշակել ենք «Կինոյի մասին» օրենք և փորձում ենք ներգրավել մասնավոր ներդրողների` ֆիլմեր ստեղծելու և ժամանակակից տեխնիկա ձեռք բերելու համար։ Հայաստանում ներդնում ենք նոր կրթական ծրագրեր և վստահ ենք, որ նախաձեռնությունները, որոնք իրագործել է ՀՀ կառավարությունը, մեր հանրապետությունը կդարձնեն շատ գրավիչ աշխարհի բոլոր կինոարտադրողների համար», – նշեց Ամիրյանը։
«Կինոն կդառնա Լյումիեր եղբայրների ֆիլմի շոգեքարշը, որն իր ետևից կտանի ողջ մշակույթը», – ասաց Ամիրյանը։
Բողոքի ակցիա
Կինոփառատոնի բացման շրջանակում գրանցվեցին նաև տհաճ միջադեպեր։ Բացման արարողությունից առաջ կինոթատրոնի դիմաց անցկացվեց բողոքի ակցիա կինոփառատոնի ֆիլմերի շրջանակում հոմոսեքսուալիզմի տարրեր պարունակող ֆիլմերի ցուցադրության դեմ։
Ակցիայի մասնակիցները պատրաստել էին պաստառներ, որոնց վրա գրված էր «Ո′չ այլասերման քարոզին»` կոչ անելով արգելել ռեժիսոր Պուրիա Հեյդարի «Ծիրանի այգիներ» (հայ դերասանների մասնակցությամբ) և Գագիկ Ղազարեի «Լսիր ինձ․ չպատմված պատմություններ ատելությունից անդին» ֆիլմերի ցուցադրությունը։
Մեկնաբանելով միջադեպը` կինոփառատոնի հիմնադիր Հարություն Խաչատրյանը լրագրողների հետ զրույցում նշեց, որ բարձրացված աղմուկը չունի լուրջ հիմքեր։
«Նմանատիպ ֆիլմեր կան և ցուցադրվում են ողջ աշխարհում։ Այս տարի փորձ արվեց կինոն վերածել թատրոնի, ինչը որոշ իմաստով հաջողվեց։ Բոլորն ունեն թատերական հմտություններ, նրանք ազատ մարդիկ են», – ավելացրեց Խաչատրյանը։
«Ոսկե ծիրան» կինոփառատոնն անցկացվում է հուլիսի 9–16–ը «Մշակույթների և քաղաքակրթությունների խաչմերուկ» նշանաբանի ներքո։
Այս տարի ստացվել է կինոփառատոնին մասնակցության 1100 հայտ, որից ընտրվել է 47 ֆիլմ, որոնք կպայքարեն երեք մրցութային ծրագրերում. 12–ը` Խաղարկային ֆիլմերի մրցույթում, 16–ը` Վավերագրական ֆիլմերի մրցույթում, և 19 ֆիլմ կմասնակցի «Հայկական համայնապատկեր» մրցույթին։
«Նովոստի–Արմենիա» գործակալությունը փառատոնի ինֆորմացիոն հովանավորն է։–0–