ԵՐԵՎԱՆ, 16 հուլիսի. /Նովոստի–Արմենիա/. «Ոսկե» և «արծաթե» ծիրանների, ինչպես նաև «Ոսկե ծիրան» XIV միջազգային կինոփառատոնի այլ պատվավոր մրցանակների հանձնման հանդիսավոր արարողությունը տեղի է ունեցել շաբաթ օրը Երևանում։
«Ոսկե ծիրան» կինոփառատոնը մեկնարկել է Երևանում հուլիսի 9–ին։ ՀՀ մշակույթի նախարար Արմեն Ամիրյանի խոսքով, այս մի քանի օրերի ընթացքում հանդիսատեսը դարձավ իսկական կինոհրավառության ականատեսը։
Եվ այսպես...
Փառատոնի գլխավոր մրցանակին՝ «Ոսկե Ծիրանին», միջազգային խաղարկային մրցույթում արժանացավ Հնդկաստանը ներկայացնող ռեժիսոր Սանալ Կումար Սասիդհարանի «Ցանկալի Դուրգան»։
«Արծաթե ծիրանին» արժանացավ բրազիլացի ռեժիսոր Ժուան Դումանսի «Արաբիա» ժապավենը, իսկ «Ժյուրիի հատուկ հիշատակում» անվանակարգում հաղթեց «Վեսթերն» ժապավենը (ռեժ.Վալեսկա Գրիզեբախ (Գերմանիա /Բուլղարիա/Ավստրիա)):
«Միջազգային վավերագրական կինո» անվանակարգում ժյուրին մրցանակը շնորհեց «Ուրվականների որս» ժապավենին (ռեժ. Ռաեդ Անդոնի (Ֆրանսիա/Պաղեստին/Շվեյցարիա/Քաթար)): Իսկ նույն անվանակարգում «Արծաթե ծիրանին» արժանացավ «Դերդո մայրիկը և ընկուզենին» (ռեժ. Սերդար Օնալ (Թուրքիա/Հայաստան)): «Ժյուրիի հատուկ հիշատակում» անվանակարգում հաղթեց «Գյուղացիներ» ֆիլմը (ռեժ. Ցվետան Դրագնև (Բուլղարիա)):
«Հայկական համայնապատկեր» մրցութային ծրագրի ժյուրին, որին շրջանակում ներկայացված էին հայ ռեժիսորների ֆիլմերը, ընտրեց հաղթողներին խաղարկային և վավերագրական կինոյի, ինչպես նաև կարճամետրաժ կինոյի կատեգորիաներում։
Եվ այսպես, լավագույն խաղարկային ֆիլմ ճանաչվեց ռեժիսոր Քրիս Ավետիսյանի «Դոնալդը լաց եղավ» ֆիլմը, որն արժանացավ Հրանտ Մաթևոսյանի անվան մրցանակին լավագույն սցենարի համար, լավագույն վավերագրական ֆիլմ ճանաչվեց ռեժիսոր Աշոտ Մկրտչյանի «Ձյուն կար» ժապավենը, իսկ լավագույն կարճամետրաժ ֆիլմ ճանաչվեց ռեժիսոր Էրիկ Շահինյանի «Ջրի երեսին մնալ» ֆիլմը։
FIPRESCI ժյուրիի մրցանակին արժանացավ իրանցի ռեժիսոր Մոհամադ Ռասուլոֆի «Անկաշառը» ֆիլմը։
Ժյուրիի հատուկ հիշատակում դերակատարման համար մրցանակին արժանացավ Սամվել Թադևոսյանը «Կյանք ու կռիվ» ֆիլմի համար (ռեժ. Մհեր Մկրտչյան (Հայաստան))։
«Ոսկե ծիրան» կինոփառատոնն անցկացվում էր «Մշակույթների և քաղաքակրթությունների խաչմերուկ» նշանաբանի ներքո։
«Նովոստի–Արմենիա» գործակալությունը փառատոնի ինֆորմացիոն հովանավորն է։–0–