ԵՐԵՎԱՆ, 5 մարտի. /Նովոստի–Արմենիա/. Լոս Անջելեսում կայացավ «Օսկարի» 90–րդ մրցանակաբաշխության արարողությունը։
Արարողությունը երկրորդ տարին անընդմեջ վարում էր կատակերգու Ջիմմի Քիմելը։ Նա սկսեց արարողությունը նախորդ տարվա միջադեպի մասին կատակով, երբ «Լավագույն ֆիլմ» անվանակարգի հաղթողներին հայտարարող դերասանները շփոթել էին ծրարները, գրում է lenta.ru–ն։
Եվ այսպես, «Լավագույն ֆիլմ» անվանակարգում հաղթող ճանաչվեց Գիլյերմո դել Տորոյի «Ջրի ձևը» ֆիլմը։ «Լավագույն ռեժիսոր» անվանակարգում հաղթեց Գիլյերմո դել Տորոն («Ջրի ձևը»)։
2–րդ պլանի լավագույն դերասանուհի ճանաչվեց Էլիսոն Ջենին «Տոնյան ընդդեմ բոլորի» ֆիլմի համար։ «2–րդ պլանի լավագույն դերասան» անվանակարգում հաղթեց Սեմ Ռոքուելը «Երեք գովազդային վահանակ Էբինգի սահմանին, Միսուրի» ֆիլմի համար։
«Լավագույն ադապտացված սցենար» անվանակարգում հաղթեց Ջեյմս Այվորին («Անվանիր ինձ քո անունով»), «Լավագույն օրիգինալ սցենար» անվանակարգում` Ջորդան Փիլը («Դու′րս այստեղից»)։
Լավագույն դերասանուհի ճանաչվեց Ֆրենսիս Մքդորմենդը («Երեք գովազդային վահանակ Էբինգի սահմանին, Միսուրի»)։ «Լավագույն դերասան» անվանակարգում հաղթող ճանաչվեց Գարի Օլդմենը «Մութ ժամանակներ» ֆիլմի համար։
«Լավագույն վավերագրական ֆիլմ» անվանակարգում «Օսկարի» արժանացավ «Իկարուս» (Icarus) ամերիկյան նախագիծը, որը նվիրված է Ռուսաստանում առաջացած դոպինգային սկանդալին։
«Լավագույն օտարերկրյա ֆիլմ» անվանակարգում հաղթեց Սեբաստյան Լելիոյի «Ֆանտաստիկ կին» ֆիլմը (Չիլի)։–0–