ԵՐԵՎԱՆ, 29 օգոստոսի. /Նովոստի-Արմենիա/. Հայաստանի ազգային կինոակադեմիան առաջիկայում կորոշի, թե հայտագրված երեք ֆիլմերից որը կներկայացնի Հայաստանը «Օսկար» 89-րդ մրցանակաբաշխության «Լավագույն օտարերկրյա ֆիլմ» անվանակարգում, «Նովոստի-Արմենիա» գործակալությանը հայտնեց կինոքննադատ, «Ոսկե ծիրան» փառատոնի ծրագրերի համակարգող Րաֆֆի Մովսիսյանը:
Ազգային կինոակադեմիան երեք հայտ է ստացել: Ներկայացվել են հետևյալ ֆիլմերը` Ջիվան Ավետիսյանի «Վերջին բնակիչը», Դավիթ Սաֆարյանի «28:94 տեղական ժամանակ» ֆիլմը և Սարիկ Անդրեասյանի «Երկրաշարժը»:
«Օսկարի կոմիտեի կողմից լիազորված կինոակադեմիայի անդամները սեպտեմբերի 3-ին փակ քվեարկությամբ կընտրեն մեկ ֆիլմ, որը կներկայացնի Հայաստանը, քանի որ երկիրն իրավունք ունի ներկայացնել միայն մեկ ֆիլմ», - ասաց Մովսիսյանը:
Ջիվան Ավետիսյանի «Վերջին բնակիչը» ֆիլմը պատմում է ադրբեջանական գյուղի վերջին բնակչի մասին, որը հայ–ադրբեջանական պատերազմից հետո ամայացել է։ Նա չի կարող հեռանալ գյուղից, քանի որ սպասում է դստերը, ով դարձել է ադրբեջանական ջարդերի վկա և հայտնվել հոգեբուժարանում։
Ռեժիսոր Դավիթ Սաֆարյանի «28:94 տեղական ժամանակ» ֆիլմի գործողությունները տեղի են ունենում 1990-ականների ցրտաշունչ ձմեռներից մեկի ժամանակ: Ֆիլմը պատմում է հնագետ Տիգրանի և նրա կնոջ` տիկնիկագործ Կատյայի հարաբերությունների մասին: Իրադարձությունները տեղի են ունենում մի քաղաքում, որտեղ չկա ո՛չ լույս, ո՛չ էլեկտրականություն, ո`չ նորմալ կենսապայմաններ, և նման իրավիճակում մարդկանց օգնում է գոյատևել հումորը և հոգևոր ջերմությունը:
Սարիկ Անդրեասյանի «Երկրաշարժ» ֆիլմը պատմում է Հայաստանում 1988 թ.-ի դեկտեմբերի 7-ին տեղի ունեցած երկրաշարժի մասին, որի հետևանքով զոհվել է ավելի քան 25 հազար մարդ: Բնական աղետի ֆոնի վրա` ֆիլմը ներկայացնում է 20-ամյա Ռոբերտ Մելքոնյանի (Վիկտոր Ստեփանյան) պատմությունը, որը հայտնվում է փրկարարական ջոկատում մի մարդու հետ, ում մեղքով տարիներ առաջ մահացել են նրա ծնողները: Վաղեմի ողբերգության մեղավորը 45-ամյա Կոնստանտին Բերեժնոյն է, որին ֆիլմում մարմնավորում է դերասան Կոնստանտին Լավրոնենկոն:
«Օսկար» 89-րդ մրցանակաբաշխությունը տեղի կունենա 2017 թ.-ի փետրվարի 26-ին: -0-
Ծանոթացեք լուրերին առաջինն ու քննարկեք դրանք մեր Telegram-յան ալիքում