Քիմ Քարդաշյան. խնդրում եմ դիտեք «Խոստումը» ֆիլմը ու վերջապես լսեք հայ ժողովրդի պատմությունը

ԵՐԵՎԱՆ, 13 ապրիլի. /Նովոստի–Արմենիա/. Ամերիկահայ հեռուստաաստղ Քիմ Քարդաշյանը հայտարարել է, որ հպարտ է Հայոց ցեղասպանության մասին «Խոստումը» հոլիվուդյան ֆիլմով ("The Promise")։

«Այնքան հպարտ եմ #ThePromise ֆիլմով։ Խնդրում եմ, բոլորդ գնացեք և դիտեք այն ու վերջապես լսեք հայ ժողովրդի պատմությունը», – գրել է Քարդաշյանը Twitter–ում։

So proud of the movie #ThePromise Everyone please go see it and finally hear the story of the Armenian people ????????

— Kim Kardashian West (@KimKardashian) 13 апреля 2017 г.

«Խոստումը» դրամայի համաշխարհային պրեմիերան տեղի է կունենա ապրիլի 21-ին, իսկ Հայաստանում` ապրիլի 27-ին:

Ֆիլմը ներկայացնում է Հայոց ցեղասպանության տարիներին տեղի ունեցած սիրո պատմություն:

Ֆիլմի ռեժիսորն է Թերի Ջորջը: Ֆիլմի սցենարի հեղինակն է Ռոբին Սվայկորդը:

Ֆիլմի գլխավոր դերակատարներն են աշխարհահռչակ դերասաններ Քրիստիան Բեյլը, Օսկար Այզեքը և Շառլոտա Լը Բոնը: Ֆիլմում նկարահանվել են նաև ֆրանսիացի աստղ Ժան Ռենոն, ինչպես նաև Ջեյմս Քրոմվելը և Անժելա Սարաֆյանը:


Ֆիլմը նկարահանվել է ամերիկահայ միլիարդատեր Քըրք Քրքորյանի ֆինանսական աջակցությամբ, ով հեռացել է կյանքից 2015 թ.–ին։

Ֆիլմի գլխավոր հերոսներն են ուսանող-բժիշկ Միքայել Պողոսյանը (Օսկար Այզեքը), ֆոտոլրագրող Քրիս Մայերը (Քրիստիան Բեյլ), ով ժամանել է Օսմանյան կայսրություն՝ լուսաբանելու աշխարհաքաղաքական իրադարձությունները և Փարիզում սովորող հայ նկարչուհի Աննան (Շառլոտա Լը Բոն): Բովանդակությունը կառուցված է նրանց սիրային եռանկյան շուրջ Օսմանյան կայսրությունում Հայոց ցեղասպանության տարիներին: -0-