ԵՐԵՎԱՆ, 1 հունիսի. /Նովոստի–Արմենիա/. Երևանի «Մոսկվա» կինոթատրոնում նախօրեին երեկոյան տեղի է ունեցել «Անբան Հուռին» հայկական երաժշտական անիմացիոն ֆիլմի փակ ցուցադրությունը։
«Անբան Հուռին» նկարահանվել է հայ մեծանուն բանաստեղծ և գրող Հովհաննես Թումանյանի համանուն հեքիաթի մոտիվներով։
Հունիսի 1–ից մուլտֆիլմն արդեն մեծ էկրանին է։
Մուլտֆիլմում ներկայացված են անբան Հուռիի ծիծաղաշարժ արկածները, որին մայրն ամուսնացրել է վաճառականի հետ։
Մուլտֆիլմի ռեժիսոր Արթուր Միքայելյանն ասուլիսի ժամանակ նշեց, որ թիմը ֆիլմի վրա աշխատել է չորս տարի։
«2013 թ.–ի վերջին առաջացան որոշ ֆինանսական դժավորություններ, ինչի պատճառով նախագիծը ժամանակավորապես դադարեցվեց։ 2014 թ.–ին «Ինդիգո» միջազգային կազմակերպությունը կազմակերպեց քրաուֆաունդինգ, ինչի արդյունքում մեզ հաջողվեց հավաքել անհրաժեշտ ֆինանսական միջոցները, որոնք թույլ տվեցին շարունակել նկարահանումները։ 2016 թ.–ին, մեզ, վերջապես, հաջողվեց ավարտել սկսած գործը, և հիմա մենք անհամբերությամբ սպասում ենք հանդիսատեսի արձագանքներին», – ասաց Միքայելյանը։
Նա նաև նշեց, որ Թումանյանի «Անբան Հուռին» հեքիաթի հիման վրա անիմացիոն ֆիլմ նկարահանելու գաղափարը ծագել է դեռ 2010 թ.–ին` ուսանողական տարիներին։ «Եվ երբ հայտնվեց հնարավորություն, մենք միանգամից սկսեցինք մուլտֆիլմի աշխատանքները», – ասաց ռեժիսորը։
Նրա խոսքով` մուլտիպլիկացիան բարդ աշխատանք է, մեկ վայրկյանի համար պահանջվում է մոտ 10–15 նկար։ «Դա բավականին բարդ է` հաշվի առնելով այն, որ մենք նկարիչ–անիմատորների պակաս ունենք», – ավելացրեց Միքայելյանը։
«Անիմացիոն ֆիլմն արդեն ներկայացրել ենք մի քանի փառատոնների, նոյեմբերին մուլտֆիլմը կներկայացվի ԱՄՆ–ում անցկացվող «Արփա» փառատոնին», – ասաց ռեժիսորը։
Խոսելով հետագա ստեղծագործական պլանների մասին` ռեժիսորը նշեց, որ նրանք մտածում են երեք մուլտիպլիկացիոն նախագծերի շուրջ, և քննարկումների ընթացքում կընտրվի դրանցից մեկը։ «Աշնանը կհայտարարենք նոր նախագծի մասին», – ավելացրեց Միքայելյանը։ –0–
Ծանոթացեք լուրերին առաջինն ու քննարկեք դրանք մեր Telegram-յան ալիքում