ԵՐԵՎԱՆ, 2 դեկտեմբերի. /Նովոստի–Արմենիա/. Այսօր ժամը 12։00–ին կկայանա ընդդիմության կողմնակիցների տեղեկատվական հավաքը Երևանի կենտրոնում, իսկ արդեն ժամը 18։00–ին Ազատության հրապարակում մենք կանցկացնենք ընդհանուր հերթական ցույցը, չորեքշաբթի «Նովոստի–Արմենիա» գործակալությանն ասաց «Ժառանգություն» կուսակցության ղեկավար Րաֆֆի Հովհաննիսյանը` «Նոր Հայաստան» հասարակական փրկության ընդդիմադիր ճակատի բողոքի ակցիաների առաջնորդներից մեկը։
«Նոր Հայաստան» հասարակական փրկության ընդդիմադիր ճակատի` նախօրեին մեկնարկած ցույցը, որի գլխավոր նպատակը դեկտեմբերի 6–ին նշանակված սահմանադրական բարեփոխումների հանրաքվեն ձախողելն էր, վերածվեց քաշքշուկների և ոստիկանության հետ բախումների։
Հովհաննիսյանի խոսքով, Ազատության հրապարակում գիշերը խաղաղ է անցել, այնտեղ են մնացել «Նոր Հայաստան» շարժման առաջնորդ Ժիրայր Սեֆիլյանը և «Ժառանգության» կուսակցության ներկայացուցիչ Արմեն Մարտիրոսյանը։
Նա պատմեց, որ ինքը չի գիշերել հրապարակում, քանի որ Հանրապետական կուսակցության գրասենյակի մոտ իրավապահների հետ բախումից հետո ստիպված է եղել մի քանի ժամով հեռանալ։ «Ես ստիպված վերադարձա տուն, զգեստափոխվեցի, բայց մի քանի ժամ անց վերադարձա հրապարակ»,– ասաց Հովհաննիսյանը։
Հրապարակի տարածքում կառուցվել է ոչ մեծ ժամանակավոր ծածկ, որի տակ մասնակիցներն անցկացրին գիշերը։ «Գիշերը հրապարակում մնացել է շուրջ 50 մարդ, լուսաբացին ոմանք մնացին այնտեղ, մյուսները շարժվեցին մոտակա սրճարաններից մեկը»,– ասաց Հովհաննիսյանը։
«Ժառանգություն» կուսակցության առաջնորդն ավելացրել է, որ ցուցարարները պատրաստվում են շարունակել պայքարը։
Ուշ երեկոյան Ազատության հրապարակում նստացույցի մասնակիցներն ինքնաշեն վրաններ էին կառուցել պաստառներից։ -0-
Ծանոթացեք լուրերին առաջինն ու քննարկեք դրանք մեր Telegram-յան ալիքում