Վալերի Օսիպյանը հանձնարարել է դուրս բերել քաղաքացիական անձանց հրդեհի վայրից, բռնկումն ուժեղացել է (ԷՔՍԿԼՅՈՒԶԻՎ, ՖՈՏՈ, ՎԻԴԵՈ)

ԵՐԵՎԱՆ, 24 օգոստոսի. /Նովոստի-Արմենիա/. ՀՀ ոստիկանապետ Վալերի Օսիպյանը ժամանել է «Մալաթիա մոլ» առևտրի կենտրոնում բռնկված խոշոր հրդեհի վայր:



Նա հանձնարարել է դուրս բերել քաղաքացիական անձանց այրվող պահեստի հարակից տարածքից, հայտնում է «Նովոստի-Արմենիա» գործակալության թղթակիցը:

Դեպքի վայր են ժամանել նաև ոստիկանության հավելյալ ստորաբաժանումներ` անվտանգության ապահովման համար:

Այս պահին Օսիպյանը ծանոթանում է հրշիջման աշխատանքների ընթացքին և անվտանգության ապահովմանը պահեստների և առևտրի կենտրոնի մոտակայքում:



Չճշտված տվյալներով, այս պահին հրդեհի ոչ զգալի ուժեղացում է դիտվում:

Հրշեջների աշխատանքը բարդանում է նրանով, որ բռնկման օջախ տանող ուղիները պահեստում դժվարամատչելի են:



Ոստիկանապետը զրուցել է առևտրի կենտրոնի պետ, գործարար Սամվել Ալեքսանյանի հետ:

Լրագրողների հետ զրույցում Օսիպյանը հայտնել է, որ իր ժամանման նպատակը տեղում իրավիճակին ծանոթանալն է:



Լրագրողների այն հարցին, թե արդյոք դիտարկվում է հրկիզման վարկածը, նա նշել է, որ քննություն է անցկացվելու, և մանրամասները հայտնի կլինեն նախաքննությունից հետո:

Հրդեհի մասին ահազանգը ստացվել է շաբաթ ժամը 15:47-ին: Այս պահին տեղում աշխատում է ԱԻՆ ՓԾ Երևան քաղաքի փրկարարական վարչության հրշեջ-փրկարարական ջոկատից 18 մարտական հաշվարկ:



4 անձ տեղափոխվել է «Աստղիկ» բժշկական կենտրոն։ Վերջիններս լուրջ վնասվածքներ չունեն և ստանում են առաջին օգնություն։

Եվս 2 տուժած «Արմենիա» ԲԿ-ում է:

«Մալաթիա մոլ» առևտրի կենտրոնը, որը գտնվում է Մալաթիա-Սեբաստիա վարչական շրջանում, սկսել է գործել 2016 թվականին: Կենտրոնը պատկանում է նախկին պատգամավոր, գործարար Սամվել Ալեքսանյանին, ում պատկանում է նաև Yerevan City սուպերմարկետների ցանցը: -0-