ԵՐԵՎԱՆ, 11 հուլիսի. /Նովոստի-Արմենիա/. Առողջապահության նախարարությունը հորդորում է քաղաքացիներին չլողալ Սևանա լճի ափամերձ որոշ տարածքներում, հայտնում է գերատեսչության մամուլի ծառայությունը։
Նախարարությունից խորհուրդ են տալիս խուսափել լողալ այն տարածքներում, որտեղ կապտականաչ ջրիմուռներ են նկատվում։
«Ցիանոբակտերը (cyanobacter) կամ կապտականաչ ջրիմուռները հանդիպում են ողջ աշխարհում` հատկապես չհոսող, սննդարար նյութերով հարուստ ջրերում։ Սրանց որոշ տեսակներ արտադրում են կենդանիների և մարդկանց առողջության վրա բացասաբար անդրադարձող թույներ (տոքսիններ), որոնց ազդեցությանը մարդիկ կարող են ենթարկվել «ծաղկած» ջուրը խմելու, դրանում լողալու կամ անզգուշաբար կուլ տալու հետևանքով»,– նշվում է հաղորդագրության մեջ։
Հաղորդման մեջ ընդգծվում է, որ նման ջրում լողալու դեպքում կարող են ի հայտ գալ հետևյալ ախտանշանները՝ ասթմա, աչքերի գրգռվածություն, ցան, մասնավորապես, բերանի և քթի շուրջ, մաշկի գրգռվածություն, ալերգիկ ռեակցիա:
Загружается новость ...
"Право"
Անզգուշությամբ ջուր կուլ տալու դեպքում կարող է ի հայտ գալ ստամոքսի ցավ, սրտխառնոց, փսխում, փորլուծություն, ջերմություն, կոկորդի ցավ, գլխացավ, մկանային և հոդերի ցավ, բլիթներ բերանի խոռոչում, լյարդի հետ կապված խնդիրներ։
Առողջական այսօրինակ խնդիրներից զերծ մնալու նպատակով առողջապահության նախարարությունը հորդորում է`
• չլողալ այն վայրերում, որտեղ նկատվում է ջրիմուռներ
• արգելել երեխաներին` լողալ չթույլատրված վայրերում,
• վերը նշված ախտանիշերի դեպքում անհապաղ դիմել բժշկի:
Չնայած նրան, որ լաբորատոր հետազոտությունները ցույց են տվել, որ առավել ռիսկային տարածքներն են Վարդենիկ և Մարտունի համայնքներին հարակից լողափերը, սակայն ջրիմուռները կարող են տեղաշարժվել, փոփոխելով տեսակների հարաբերակցությունը` կախված օդի և ջրի ջերմաստիճանից, քամու ուղղությունից և ուժից, հայտնում են գերատեսչությունից։ -0-
