Թորոսյան. կպարզեցվի պետական պատվերի շրջանակներում երեխաների բուժօգնության տրամադրման գործընթացը

ԵՐԵՎԱՆ, 13 սեպտեմբերի. /Նովոստի–Արմենիա/. Հայաստանի առողջապահության նախարար Արսեն Թորոսյանը հայտնել է երեխաներին պետպատվերի շրջանակում բժշկական օգնության ցուցաբերման ընթացակարգի պարզեցման մասին։

«Քիչ առաջ ստորագրեցի հրաման, որն էականորեն կպարզեցնի պետական պատվերի շրջանակներում երեխաների բուժօգնության տրամադրման գործընթացը: Այլևս անհրաժեշտ չի լինի բուժհիմնարկ ներկայացնել «Երեխայի առողջության պետական հավաստագիրը»,- գրել է Թորոսյանն իր Facebook–ում։

Նրա խոսքով, կարիք կլինի ներկայացնել միայն երեխայի և ծնողներից մեկի կամ օրինական ներկայացուցչի անձը հաստատող փաստաթուղթը (ծննդական, անձնագիր):
«Հրամանը ուժի մեջ կմտնի հոկտեմբերի 1-ից»,– գրել է նա։


2019 թվականի հունիսի 27–ի կառավարության նիստում հավանություն է տրվել «Բժշկական ծառայություններ երեխաների համար» ծրագրի ընդլայնման և շահառուների ցուցակում մինչև 18 տարեկան երեխաներին ընդգրկելու օրինագծին։ Այդ նպատակներով կհատկացվի 1.75 մլրդ դրամ (ավելի քան $3,6 մլն):

Ընթացիկ փոփոխությունները չեն տարածվում ատամնաբուժական ծառայությունների, խորհրդատվությունների, ինչպես նաև ախտորոշման հստակեցման լաբորատոր–սարքավորումային հետազոտությունների վրա։ -0-