Քաշքշել, հայհոյել, սպառնացել են Արթուր Իսպիրյանին. ոստիկանությունն արձագանքել է

ԵՐԵՎԱՆ, 21 մայիսի. /Նովոստի–Արմենիա/. Երգիչ, «Իմ քայլը» խմբակցության անդամ Արթուր Իսպիրյանը հրավիրվել է Ոստիկանություն։

Նախօրեին ԶԼՄ–ները տեղեկատվություն են տարածել, որ մի խումբ անձինք Կասկադի տարածքում մոտեցել են երեխաների հետ սրճարանում նստած Երևանի ավագանու «Իմ քայլը» խմբակցության անդամ Արթուր Իսպիրյանին, հայհոյանքներ հնչեցրել, քաշքշել են։

Ինչպես ինքը` Իսպրիյանն է պատմել armlur.am–ին, նրանցից մեկին ճանաչել է` Նարեկ Մալյանի հետ հաղորդում է վարում, ով նաև իր Facebook-ում սպառնալիքներ է հնչեցրել հեղափոխականների հասցեին և սպառնացել հաշվեհարդար տեսնել։

Ոստիկանության պետ Վալերիյ Օսիպյանի հանձնարարությամբ՝ հրապարակումից անմիջապես հետո կապ է հաստատվել Արթուր Իսպիրյանի հետ, և նրան հրավիրել են ոստիկանություն՝ լրացուցիչ պարզաբանումների համար:

Կարճ ժամանակում ճշտվել է միջադեպի մասնակիցների ինքնությունը:

Միջոցառումներ են ձեռնարկվում դեպքի բոլոր հանգամանքները պարզելու համար: -0-