ԵՐԵՎԱՆ, 18 ապրիլի. /Նովոստի–Արմենիա/. Ռուսաստանի նախագահ Վլադիմիր Պուտինը Եվրասիական տնտեսական հանձնաժողովի կոլեգիայի նախագահ Տիգրան Սարգսյանի հետ քննարկել է եվրասիական ինտեգրման զարգացման և ԵՏՄ երկրների տնտեսությունների աճի հարցեր։
Հանդիպման ընթացքում Պուտինը նշել է, որ իրենք լավ ծանոթ են, քանի որ միասին աշխատել են, երբ գլխավորել են Ռուսաստանի և Հայաստանի կառավարությունները։
«Այժմ Ձեր առաքելությունը շատ պատասխանատու է` Դուք դարձել եք միջազգային պաշտոնյա, բարձր կարգի պաշտոնյա։ Հույս ունեմ, որ Ձեր գլխավորությամբ Եվրասիական միության հանձնաժողովը հաջողություն կունենա աշխատանքում»,– Պուտինի խոսքն է մեջբերում Կրեմլի պաշտոնական կայքը։
Նա Սարգսյանին հաջողություն է մաղթել։ «Մենք Ձեզ հետ այս ձևաչափով հանդիպում ենք առաջին անգամ։ Առաջիկայում Երևանում կառավարությունների ղեկավարների հանդիպումներ ունենք, իսկ այնուհետև` Աստանայում պետությունների ղեկավարների հանդիպում, այնպես որ Ձեզ հետ միասին կպատրաստվենք այդ լուրջ միջոցառումներին»,– ասել է Պուտինը։
Կոլեգիայի ղեկավարն իր հերթին շնորհակալություն է հայտնել Եվրասիական տնտեսական միության զարգացման հեռանկարների քննարկման հնարավորության համար։ «Ինչպես Դուք նշեցիք, իսկապես ինտեգրման ներուժ է կուտակվել, որը պետք է ծառայի մեր ժողովուրդների շահերին։ Մյուս կողմից, մենք պետք է հաջորդականություն ապահովենք մեր կոլեգիայի աշխատանքում։ Մյուս կողմից, մենք պետք է պատրաստ լինենք ադեկվատ պատասխանել այսօրվա նոր մարտահրավերներին»,– նշել է Սարգսյանը։ -0-
Ծանոթացեք լուրերին առաջինն ու քննարկեք դրանք մեր Telegram-յան ալիքում
