Փաշինյանը մեկնաբանել է Լավրովի հայտարարությունն այն մասին, թե Հայաստանում իրավիճակը «շարունակում է եռալ»

ԵՐԵՎԱՆ, 4 սեպտեմբերի. /Նովոստի–Արմենիա/. Հայաստանի վարչապետ Նիկոլ Փաշինյանը երեքշաբթի լրագրողներին մեկնաբանել է ՌԴ ԱԳ նախարար Սերգեյ Լավրովի այն հայտարարությունը, թե Հայաստանում իրավիճակը «շարունակում է եռալ»։

Լավրովը նախօրեին հայտարարել է, որ Ռուսաստանին մտահոգում է այն, որ Հայաստանում այժմ իրավիճակը շարունակում է եռալ և, մասնավորապես, հետաքննվում են տասնամյա վաղեմության իրադարձություններ, կատարվում են կալանավորումներ։

«Այսօր իրոք շոգ էր»,– ասել է վարչապետը։


Երևանի ընդհանուր իրավասության դատարանը հուլիսի 28–ին որոշում է կայացրել 2 ամսով կալանավորել Հայաստանի երկրորդ նախագահ Ռոբերտ Քոչարյանին մարտի 1–ի գործի շրջանակում։ Նա մեղադրվում է մի խումբ անձանց հետ նախնական պայմանավորվածությամբ սահմանադրական կարգը տապալելու համար։ Որպես մեղադրյալ ներգրավվել է նաև ՀԱՊԿ գլխավոր քարտուղար Յուրի Խաչատուրովը, ով 5 մլն դրամ գրավի դիմաց ազատ է արձակվել, և Հայաստանի պաշտպանության նախկին նախարար Միքայել Հարությունյանը, ում նկատմամբ հայտարարվել է միջպետական հետախուզում։

Օգոստոսի 13–ին Վերաքննիչ դատարանը բավարարել է Քոչարյանի փաստաբանների միջնորդությունը, և Քոչարյանն ազատ է արձակվել դատարանի դահլիճից` հաշվի առնելով նրա անձեռնմխելիությունը։ Հայաստանի Վճռաբեկ դատարանն օգոստոսի 21–ին ստացել է Վերաքննիչ դատարանի` Քոչարյանին ազատելու որոշման վերաբերյալ Գլխավոր դատախազության բողոքը, որը կդիտարկվի 3 ամսիների ընթացքում։ -0-