ԵՐԵՎԱՆ, 10 հունվարի./Նովոստի–Արմենիա/. Հայաստանի վարչապետի պաշտոնակատար Նիկոլ Փաշինյանին վախեցել է որդեգրվող երեխաների տրաֆիքինգի և օրգանների վաճառքի մասին լուրերից։
Հայաստանի կառավարությունը հինգշաբթի քննարկել է որգեգրված երեխաների հարցը և իրենց կենսաբանական ծնողներին ճանաչելու հնարավորությունները, սակայն մասնավոր հարցի քննարկումը վերաճել է մանկատների և որդեգրման հետ կապված խոսակցության։
Փաշինյանը, մասնավորապես, նշել է, որ որդեգրման գործընթացում առկա են նաև կոռուպցիոն ռիսկեր, որոնք անհրաժեշտ է ստուգել, այդ թվում` որդեգրման մասին տեղեկատվության տրամադրման վերաբերյալ։
Այս կապակցությամբ Հայաստանի առաջին փոխվարչապետի պաշտոնակատար Արարատ Միրզոյանը հայտնել է, որ կատարել է ոլորտի բավականին լուրջ ուսումնասիրություն։
«Ես կարող եմ ասել, որ սա ոչ թե կոռուպցիա է, այլ մենք գործ ունենք մաֆիայի հետ, ես փորձել եմ քանդել այս կծիկը, թվում էր, թե արդեն ստացվում է, բայց ի վերջո արդյունքի չհասանք։ Կա ավելի սարսափելի երևույթ` երեխաների, այդ թվում` արտերկրում որդեգրվող երեխաների օրգանների վաճառքը, ինչպես նաև տրաֆիքինգը»,– ասել է Միրզոյանը։
Նա նշել է, որ կան երկրներ, որտեղ որդեգրվելիս կան նմանատիպ մտավախություններ, որ, մասնավորապես, երեխաներին որդեգրելուց հետո նրանք կարող են զրկվել, ենթադրենք, մեկ երիկամից։
«Աշխարհում կա այսպիսի պրակտիկա, և կան լուրեր, որոնք մենք ստուգում ենք։ Այստեղ լրջագույն վերահսկողություն է անհրաժեշտ, և այն պետք է խստացվի, որ այս ռիսկերն իրականություն չդառնան»,– ասել է Միրզոյանը։
Փաշինյանը միանգամից արձագանքել է այս հայտարարությանը` «Այսպիսի բան կա՞», Միրզոյանն ասել է, որ Հայաստանում դեռևս այսպիսի դեպքեր չեն գրանցվել։
«Չէ, սրանք շատ զգայուն թեմաներ են, ճնշումս բարձրացավ մի քիչ»,– ասել է Փաշինյանը։
Վարչապետի պաշտոնակատարի կասկածները փարատել է ԱԱԾ ղեկավար Արթուր Վանեցյանը, ով հայտարարել է, որ նմանատիպ տեղեկություն չկա, բայց իրավիճակը վերահսկվում է։
Загружается новость ... "Лево"
«Մինչ օրս Հայաստանից չեն որդեգրվել երեխաներ օրգանների վաճառքի նպատակով։ Հավաստիացնում եմ, որ գործընթացը խիստ վերահսկվում է, և մենք տիրապետում ենք իրավիճակին»,– ասել է Վանեցյանը։
Գլխավոր դատախազ Արթուր Դավթյանը նույնպես հայտարարել է, որ չկա տրաֆիքինգի կամ օրգանների վաճառքի նպատակով Հայաստանից երեխաների որդեգրման որևէ դեպք։
Հայաստանում գործում է 6 մանկատուն, որտեղ ապրում են 600 երեխաներ։ Տարեկան մոտ 20-30 երեխաներ լքում են մանկատան պատերը չափահաս դառնալուն պես։ -0-