Փաշինյան–Կարապետյան բանակցություններ կանցկացվեն` իշխանության անցնցում փոխանցման վերաբերյալ

ԵՐԵՎԱՆ, 23 ապրիլի./Նովոստի–Արմենիա/. «Ելք» ընդդիմադիր կուսակցության առաջնորդ, «Քաղաքացիական պայմանագիր» կուսակցության ղեկավար Նիկոլ Փաշինյանը հայտարարեց, որ չորեքշաբթի բանակցություններ կանցկացնի Հայաստանի վարչապետի պաշտոնակատար Կարեն Կարապետյանի հետ` երկրում իշխանության անցնցում փոխանցման վերաբերյալ։

Հանրապետությունում անցկացվող բողոքի լայնածավալ ակցիաների ֆոնին ապրիլի 23–ին Հայաստանի վարչապետ Սերժ Սարգսյանը հայտարարեց իր հրաժարականի մասին։

«Մենք չորեքշաբթի ժամը 11։00–ին «Մարիոթ» հյուրանոցում կշարունակենք բանակցություններն իշխանության անցնցում փոխանցման վերաբերյալ վարչապետի պաշտոնակատար Կարեն Կարապետյանի հետ։ Հույս ունեմ, որ ՀՀԿ վերնախավը միանշանակ և անվերապահորեն կճանաչի թավշյա հեղափոխության հաղթանակը։ Որքան ավելի շուտ լինի այդ փաստի հաստատումը, այնքան ավելի լավ Հայաստանի և Արցախի համար։ Ուզում եմ, որ միանշանակ և անկասկած փաստենք, որ մեր հայտարարած թավշյա հեղափոխությունը չի կարող կիսատ մնալ»,– ասաց Փաշինյանը։

Նշելով, որ օրակարգի առաջին հարցը` Սերժ Սարգսյանի հրաժարականը վարչապետի պաշտոնից, արդեն կատարված է, նա նշեց, որ օրակարգում դեռ շատ հարցեր կան։


«Ուզում եմ, որ տոնենք թավշյա հեղափոխության մեր գլխավոր հաղթանակը։ Բայց մեր օրակարգում մի քանի հարցեր կան։ Առաջինը` Սերժ Սարգսյանի հրաժարականը վարչապետի պաշտոնից։ Երկրորդը` Հայաստանի Ազգային ժողովը վարչապետ է նշանակում ժողովրդի առաջադրած թեկնածուին։ Դրանից հետո ձևավորվում է ժամանակավոր կառավարություն։

Այնուհետև Հայաստանում խելամիտ, բայց սեղմ ժամկետներում պետք է կայանան արտահերթ խորհրդարանական ընտրություններ»,– ասաց Փաշինյանը։

Նա համոզմունք հայտնեց, որ բոլոր հավաքվածները կողմ են վերջնական հաղթանակին։

«Եթե Սերժ Սարգսյանը և ՀՀԿ–ն հույս ունեն, որ ամեն ինչի արդյունքում կստեղծեն իրավիճակ, որի դեպքում կիրականացնեն ստվերային կառավարում, կոչ եմ անում բոլորին մոռանալ դրա մասին։ Ժողովուրդը հաղթել է, այդ հաղթանակը պետք է ընդունվի առանց նախապայմանների»,– ասաց Փաշինյանը։ -0-