ԵՐԵՎԱՆ, 1 մայիսի./Նովոստի–Արմենիա/. Հայաստանի վարչապետի թեկնածու Նիկոլ Փաշինյանը հայտնեց, որ Հայաստանի վարչապետ ընտրվելուց հետո մտադիր է քաղաքական երկխոսություն սկսել խորհրդարանական բոլոր խմբակցությունների հետ։
Մայիսի 1–ին Հայաստանի ԱԺ–ում անցկացվում են վարչապետի ընտրությունները։
«Նոր կառավարության հիմնական խնդիրը համերաշխության դրսևորումն է լինելու։ Այսօր իմ` վարչապետ ընտրվելուց հետո ես քայլեր կձեռնարկեմ առանց բացառության բոլոր խորհրդարանական խմբակցությունների հետ քաղաքական երկխոսություն սկսելու ուղղությամբ, այդ թվում` Հանրապետական կուսակցության հետ, մի ձգտումով` լսելու միմյանց դիրքորոշումները երկրում ստեղծված իրավիճակի հետագա զարգացման ուղղությամբ։ Վստահ եմ, որ շատ հարցերում համակարծիք կլինենք»,– ասաց Փաշինյանը։
Նա ընդգծեց, որ հարցն այն չէ, թե ում կընտրեն վարչապետ, հարցն այն է, թե կնպաստի արդյո՞ք իշխող կուսակցությունը քաղաքական ճգնաժամի հաղթահարմանը, թե այն կլուծվի առանց նրանց մասնակցության։
Ըստ նրա, իրենց քաղաքական պայքարն առաջին օրվանից եղել է «բաց ձեռքերի», ոչ բռնի պայքար, և ինքը չի պատկերացնում իրադարձությունների այնպիսի զարգացում, որը դուրս կլինի այս տարմաբանությունից և գաղափարախոսությունից։
«Մենք մերժում ենք բռնությունը ոչ միայն որպես գործողություն, այլ նաև որպես հակազդեցություն։ Մենք ոչ միայն բռնություն չենք կիրառելու, այլ չենք պատասխանի բռնությամբ մեր դեմ կիրառված բռնությանը։ Սակայն քաղաքական իրավիճակն այնպիսին է, որ այսպիսի սցենարի մասին խոսելն ավելորդ է։ Եթե ուզում ենք լուծել քաղաքական ճգնաժամը, ուրեմն պետք է հաշվի առնել դեպքերի իրական դրությունը»,– ասաց Փաշինյանը։
Նա ընդգծեց, որ արդեն ասել է նախկին նախագահ Սերժ Սարգսյանին, որ ինքը սխալ է գնահատում երկրի իրավիճակը, քանի որ սա արդեն ուրիշ Հայաստան է, որտեղ ՀՀԿ–ն չի կարող լինել իշխող ուժ և որքան արագ դա արձանագրվի, այնքան լավ։
Ըստ նրա, եթե ՀՀԿ–ն մտահոգվում է նրանով, որ ակցիաների ամեն օրը վնաս է հասցնում տնտեսությանը և կան լուծում պահանջող օպերատիվ հարցեր, ապա նրանք պետք է ապացուցեն, որ մտածում են երկրի մասին, այլ ոչ թե հետապնդում են անձնական և ներխմբային շահեր։
«ՀՀԿ–ն այլևս չունի իշխանություն և չի ունենա, և որքան ավելի արագ դա արձանագրվի, այնքան լավ։ Այսօր ժողովրդի հաղթանակն անհրաժեշտ է արձանագրել և դա պետք է երկխոսության հիմք ծառայի, և ես դրան պատրաստ է»,– ասաց Փաշինյանը։
Ապրիլի 13–ից հանրապետությունում իրականացվող բողոքի մասշտաբային ակցիաների ֆոնին ապրիլի 23–ին ՀՀ վարչապետ Սերժ Սարգսյանը հայտարարեց իր հրաժարականի մասին։ Նույն օրը ՀՀ նախագահ Արմեն Սարգսյանն ընդունեց կառավարության հրաժարականը։
Ապրիլի 30–ին «Ելք» խմբակցությունն ըննդիմության առաջնորդ և խմբակցության ղեկավար Նիկոլ Փաշինյանին առաջադրեց վարչապետի թեկնածու։ «Ելք» և «Ծառուկյան» դաշինքների խմբակցությունները, ինչպես նաև ՀՅԴ–ն հայտարարեցին Փաշինյանի թեկնածությանն աջակցելու մասին։ ԱԺ փոխխոսնակ, ՀՀԿ գործադիր մարմնի անդամ Էդուարդ Շարմազանովը նախօրեին հայտարարեց, որ խմբակցությունը վարչապետի ընտրությունների շուրջ որոշում կընդունի Փաշինյանի ծրագրին ծանոթանալուց հետո։ ՀՀԿ խմբակցության ղեկավար Վահրամ Բաղդասարյանը երեքշաբթի հայտարերց, որ ՀՀԿ–ն մտադիր չէ տապալել ԱԺ նիստն ու պատրաստ է ապահովել անհրաժեշտ քվորումը նիստն անցկացնելու համար։ -0-
Ծանոթացեք լուրերին առաջինն ու քննարկեք դրանք մեր Telegram-յան ալիքում