Նորածին հնգյակից 2–ի վիճակը համեմատաբար ծանր է, 3–ինը` կայուն

12:20

04 Մայիսի 2017

ԵՐԵՎԱՆ, 4 մայիսի. /Նովոստի–Արմենիա/. ՀՀ ԱՆ գլխավոր նեոնատոլոգ Պավել Մազմանյանը մայիսի 3-ի երեկոյան այցելել է մայրաքաղաքի տարբեր ծննդատներում բուժվող հնգյակին, գրել է ՀՀ առողջապահության նախարարի մամուլի քարտուղար Անահիտ Հայթայանը Facebook-ի իր էջում։

Մասնագետը բժիշկների հետ քննարկել փոքրիկների բուժման ընթացքը։

Մոր և մանկան առողջության պահպանման գիտահետազոտական կենտրոնում Պավել Մազմանյանի հսկողության տակ գտնվող փոքրիկը մայիսի 3-ի՝ ժամը 12-ի դրությամբ սկսել է շնչել առանց արհեստական շնչառական սարքի։

Հայթայանի տեղեկացմամբ, կայուն է նաև «Էրեբունի» և «Սուրբ Աստվածամայր» ԲԿ-ների մասնագետների հսկողության տակ գտնվող նորածինների վիճակը։ Այդ վիճակը պահպանվելու դեպքում հնարավոր է, որ այսօր նրանք ևս սկսեն շնչել առանց արհեստական շնչառական սարքի։

«Համեմատաբար ավելի ծանր է «Մուրացան» բժշկական համալիրում հսկողության տակ գտնվող փոքրիկների վիճակը։ Մասնագետներն ամեն ինչ անում են նրանց ծանր վիճակից դուրս բերելու համար»,- իր գրառման մեջ նշել է Հայթայանը։

Նախօրեին «Էրեբունի» ԲԿ–ում առավոտյան ժամը 04։00-ին լույս աշխարհ է եկել հնգյակ. 4 աղջիկ, 1 տղա։ Աննան, Թեհմինեն, Ռոզին, Լիլիթը և Արան ծնվել են Մեծամորում բնակվող Կարապետյանների ընտանիքում։ Ընտանիքն ապրում է հանրակացարանում։

Նորածիններին տարբեր հիվանդանոցներ տեղափոխելու որոշումը պայմանավորված է պատշաճ խնամք ապահովելու և բուժօգնություն ցուցաբերելու նպատակով։

Փոքրիկները լույս աշխարհ են եկել 600, 820, 840, 840 և 880 գրամ քաշով։ Անհրաժեշտ վերակենդանացման միջոցառումներ ցուցաբերելուց անմիջապես հետո նորածիններից երկուսը` տղան և աղջիկներից մեկը, տեղափոխվել են «Մուրացան» բժշկական համալիր` ՀՀ ԱՆ գլխավոր մանկական ռեանիմատոլոգ Հրանտ Կալենտերյանի հսկողության ներքո։
Նույն ժամանակ նորածիններից մեկը տեղափոխվել է «Սուրբ Աստվածամայր» ԲԿ-ի, իսկ մյուսը` Մոր և մանկան առողջության պահպանման գիտահետազոտական կենտրոնի վերակենդանացման բաժանմունքներ։

Փոքրիկներից մեկը մնացել է «Էրեբունի» ԲԿ-ի նորածնային վերակենդանացման բաժանմունքում։

Բոլոր 5 փոքրիկները կյանքի առաջին իսկ րոպեներին ինտուբացվել են, ապա կլինիկաներում նրանց միացվել են արհեստական շնչառական սարքեր։

Ծանոթացեք լուրերին առաջինն ու քննարկեք դրանք մեր Telegram-յան ալիքում

#Երևան #հնգյակ #առողջական վիճակ #բժիշկներ

Թեմատիկ նյութեր