ԵՐԵՎԱՆ, 11 մայիսի. /Նովոստի-Արմենիա/. Հայաստանի վարչապետ Նիկոլ Փաշինյանը պատմեց Հայաստանի ԶՈՒ գլխավոր շտաբի ներկայացուցիչների հետ հանդիպման մասին և ուղերձով դիմեց ժամկետային զինծառայողների ծնողներին:
«Բազմաթիվ զինծառայողների ծնողներ ստիպված են իրենց երեխաներին հագուստ, կոշիկ և անձնական հիգիենայի պարագաներ ուղարկել: Այսօր առավոտյան այդ հարցը շատ խիստ դրել եմ ԶՈՒ Գլխավոր շտաբի ներկայացուցիչների առաջ»,- ասաց նա իր Facebook-ի էջի ուղիղ եթերում:
Այս կապակցությամբ Փաշինյանը դիմեց զինծառայողների ծնողներին և նշեց, որ պետությունը պարտավոր է իրենց երեխաներին ապահովել ամեն անհրաժեշտ պարագաներով` սկսած հիգիենիկ միջոցներից և ավարտած հագուստով, ներքնաշորերով և սննդով:
«Կոչ եմ անում, սկսած այս պահից, ոչ մի պայմանով չուղարկել երեխաներին հագուստ, ռազմակոշիկ, հիգիենայի միջոցներ և այն ամենը, ինչ պետությունը պարտավոր է տալ զինվորին:
Եթե ստացվի այնպես, որ ձեր որդիներն ասեն, որ ապահովված չեն դրանով, այդ դեպքում խնդրում եմ ձեզ դիմել վարչապետի աշխատակազմ, ինձ անձամբ կամ մամուլում հրապարակել զորամասի համարը և այն խնդիրը, որ ծագել է ձեզ մոտ»,- ասաց նա:
Վարչապետը հայտնեց, որ Գլխավոր շտաբի ներկայացուցիչները պարտավորություն են ստանձնել ապահովել զինվորներին անհրաժեշտ իրերով:
«Ասվածի իմաստն այն է, որ եթե նույնիսկ ձեր երեխաներն ասում են, որ հագուստ կամ հիգիենայի միջոցներ չունեն, ապա խնդրում եմ չգնալ գնումների և չուղարկել դա, այլ դիմել մամուլին, վարչապետի աշխատակազմին և գրել ինձ: Մենք այդ հարցերը կլուծենք»,- ընդգծեց Փաշինյանը:
Կառավարության ղեկավարը միաժամանակ նշեց, որ իրեն հավաստել են, որ այդ խնդիրները կլուծվեն, և «եթե հանկարծ պարզվի, որ չեն լուծվել, դրան կհետևի խիստ պատասխանատվություն բոլոր նրանց նկատմամբ, ովքեր պետք է դրանք լուծեին ու չեն լուծել»: -0-
Ծանոթացեք լուրերին առաջինն ու քննարկեք դրանք մեր Telegram-յան ալիքում
