Կոլորադոյում ապրիլը հայտարարվել է Հայոց ցեղասպանության մասին իրազեկման ամիս

ԵՐԵՎԱՆ, 5 ապրիլի. /Նովոստի–Արմենիա/. Ամերիկյան Կոլորադո նահանգի ղեկավար Ջարեդ Պոլիսը (Jared Polis) 2019 թվականի ապրիլը հայտարարել է Օսմանյան կայսրությունում Հայոց ցեղասպանության մասին իրազեկման ամիս, հայտնում է Ամերիկայի հայ ազգային կոմիտեն (ANCA)։

Նախօրեին ստորագրած հայտարարությունում նահանգապետը կարևորել է Ցեղասպանության հարցի ուսումնասիրությունը և կոչ է արել այդ ողբերգության մեղավորներին խոստովանել մարդկության դեմ իրենց հանցագործությունները։



2019 թվականի մարտի 20–ին Ալաբամա ամերիկյան նահանգի ղեկավար Քեյ Այվին հռչակագիր է ստորագրել 1915 թվականի Հայոց ցեղասպանության ճանաչման վերաբերյալ։ Այսպիսով, ԱՄՆ 50 նահանգներից 49–ը (բացի Միսիսիպիից) ճանաչել են Ցեղասպանության փաստը։
Հայոց ցեղասպանությունը ХХ դարի առաջին ցեղասպանությունն է։ Թուրքիան ավանդաբար մերժում է Առաջին համաշխարհային պատերազմի տարիներին շուրջ մեկուկես միլիոն հայերի զանգվածային ջարդեր իրականացնելու մեղադրանքները և չափազանց ցավագին է վերաբերվում Արևմուտքի քննադատություններին։

Հայոց ցեղասպանության փաստը ճանաչել են բազմաթիվ երկրներ, մասնավորապես` Ուրուգվայը, Լիտվան, Ռուսաստանը, Ֆրանսիան, Իտալիայի խորհրդարանի ստորին պալատը, Չեխիայի խորհրդարանը, Հոլանդիան, Սլովակիան, Շվեդիան, Շվեյցարիան, ԱՄՆ 49 նահանգներ, ինչպես նաև Հունաստանի, Կիպրոսի, Արգենտինայի, Բելգիայի, Ուելսի, Լյուքսեմբուրգի խորհրդարանները, Կանադայի խորհրդարանի համայնքների պալատը և Լեհաստանի սեյմը, Պարագվայի Սենատը,Վատիկանը, Եվրախորհդարանը, Եկեղեցիների համաշխարհային խորհուրդը, Գերմանիայի Բունդեսթագը և այլ երկրների խորհրդարաններ: -0-