ԵՐԵՎԱՆ, 27 ապրիլի. /Նովոստի-Արմենիա/. Համահայկական շաբաթօրյակ կանցկացվի հանրապետությունում ապրիլի 29–ին, հայտնեց միջոցառման կազմակերպիչ, ճարտարապետ Հայկ Զալիբեկյանը։
«Միջոցառումը կանցկացվի «Դուրս արի բակ» կարգախոսով, այսինքն` կոչ է արվում մարդկանց դուրս գալ և մաքրել տան և բակի շրջակայքը»,– հինգշաբթի ասաց նա «Նովոստի–Արմենիա» մամուլի կենտրոնում։
Զալիբեկյանը պարզաբանեց, որ շաբաթօրյակը կկազմակերպվի նաև Երևանի կոնկրետ տարածքներում, մասնավորապես, Հրազդանի կիրճում, Մանկական երկաթուղու տարածքում, Հաղթանակի զբոսայգում, Արաբկիր վարչական շրջանում, Խանջյանի փողոցում տեղակայված զբոսայգիներում և Բուսաբանական այգում։
«Մենք շաբաթօրյակի բոլոր մասնակիցներին կտրամադրենք անհրաժեշտ գործիքներ` ձեռնոցներ և պարկեր աղբի համար»,– ընդգծեց Զալիբեկյանը։
Նա նշեց, որ շաբաթօրյակին, որը մեկնարկում է ժամը 10։00–ին, ենթադրաբար կմասնակցի ավելի քան հազար մարդ։
Զալիբեկյանն ավելացրեց, որ շաբաթօրյակը կանցկացվի #killzibil կարգախոսով` կոչ անելով լուսանկարել մաքրվող տարածքները, հրապարակել այդ լուսանկարները սոցցանցերում տվյալ հեշթեգով` հետևելու համար միջոցառման մասնակցության ակտիվությունը։
Միջոցառման համակազմակերպիչ, ճարտարապետ Զառա Պարունակյանն իր հերթին ավելացրեց, որ նախաձեռնությանը միացել են բազմաթիվ կամավորներ, դպրոցական, համալսարանական խմբեր և առանձին ընկերությունների ներկայացուցիչներ։
Նա այդ համատեքստում ընդգծեց, որ մինչև մարդիկ չսկսեն իրենց երկրին վերաբերվել այնպես, ինչպես վերաբերվում են իրենց տանը, մաքրության հարցն այդպես էլ չի լուծվի։
«Երևան 2.0» նախագծի ղեկավար Գայանե Մանուկյանն ասաց, որ աղբահավաքի խնդիրը գլոբալ բնույթ է կրում։
«Դա տեղի է ունենում ոչ միայն քարոզման պակասի, այլ նաև օրենսդրական կարգավորման բացակայության պատճառով։ Փորձը և հայկական մտածողությունը ցույց են տալիս, որ եթե մարդու գործունեությունը չսահմանափակվի օրենսդրությամբ, արդյունքների հասնել գրեթե անհնար է»,– ավելացրեց Մանուկյանը։ -0-
Ծանոթացեք լուրերին առաջինն ու քննարկեք դրանք մեր Telegram-յան ալիքում