ԵՐԵՎԱՆ, 25 մարտի. /Նովոստի-Արմենիա/. Աշխարհում կարմրուկի համաճարակային իրավիճակը շարունակում է մնալ լարված, գրել է Հայաստանի առողջապահության նախարար Արսեն Թորոսյանը Facebook-ի իր էջում, նշելով, որ դեպքերը համաճարակաբանորեն կապվում են Ուկրաինայի և Վրաստանի հետ:
Նախարարի խոսքով, Հայաստանում կարմրուկի առումով իրավիճակը կայուն է, սակայն տարվա սկզբից լաբորատոր հաստատված բերովի արդեն չորրորդ դեպքն է գրանցվում:
«Չորրորդ դեպքն արձանագրվել է Իտալիայի քաղաքացու մոտ, որը Հայաստան է ժամանել Ուկրաինայից 2 շաբաթ առաջ` առանց որևէ կլինիկական երևույթների: Ախտանշաններն ի հայտ են եկել մեկ շաբաթ առաջ՝ ունեցել է ջերմության բարձրացում, ընդհանուր թուլություն, իսկ մարտի 23-ից սկսել է մարմնի ցանավորումը: Մարտի 25-ին կատարվել է լաբորատոր հետազոտություն, և հիվանդի մոտ հաստատվել է կարմրուկ»,- գրել է նա:
Հիվանդը վարակիչ շրջանում եղել է Արամի փողոցի վրա գտնվող տարբեր հանրային վայրերում և ունեցել է բազմաթիվ շփումներ այլ քաղաքացիների հետ, ովքեր մեծ հավանականութամբ կարող են վարակված լինել և նպաստել երկրում վիրուսի տեղական տարածմանը և նոր դեպքերի առաջացմանը:
Նախարար Թորոսյանը հիշեցրել է, որ կարմրուկը խիստ վարակիչ վիրուսային հիվանդություն է, որը բնորոշվում է արտահայտված ինտոքսիկացիայով, կատառալ և ցանային երևույթներով: Վարակը փոխանցվում է օդակաթիլային ճանապարհով և օժտված է խիստ բարձր վարակելիությամբ:
Նա նախազգուշացրել է, որ պատվաստումներն ամենաանվտանգ և արդյունավետ հանրային առողջապահական միջոցառումներն են, որոնց շնորհիվ յուրաքանչյուր տարի փրկվում են միլիոնավոր կյանքեր:
Загружается новость ... "Лево"
«Այն անձինք, ովքեր չունեն կարմրուկի դեմ առնվազն երկու դեղաչափ պատվաստում, հորդորում եմ դիմել տեղամասային պոլիկլինիկա և պատվաստվել` միայն այս դեպքում զերծ կմնաք հիվանդությունից»,- ընդգծել է նախարարը:
Ներկայում Եվրոպայում կարմրուկի համաճարակը լուրջ առողջապահական խնդիր է, և ավելի քան հինգ տասնյակ մահվան դեպք է գրանցվել, ինչը պատվաստումների վերաբերյալ ապատեղակատվության տարածման արդյունք է:
Նման միտումների հետագա շարունակումը, ըստ նախարարի, կարող է հանգեցնել արդեն իսկ վերացված վարակիչ հիվանդությունների հետվերադարձին` զանգվածային հիվանդացման դեպքերի, բռնկումների, համաճարակների, ինչպես նաև մահվան դեպքերի: Տեղին է նշել, որ որոշ երկրներում արդեն իսկ դիտվում է դիֆթերիայի հետվերադարձ՝ ուղեկցվելով բռնկումներով, մահվան դեպքերով: -0-