ԵՐԵՎԱՆ, 9 հունվարի./Նովոստի–Արմենիա/. Կարագանդայի ռեստորաններից մեկում տեղի ունեցած ծեծկռտուքի և սպանության գործով հետախուզվող Նարեկ Գուրուրյանը ձերբակալվել է Ռուսաստանում։ Այդ մասին, ինչպես հայտնում է
kaztag.kz–ը, հայտնել է Ղազախստանի ներքին գործերի ներքին և արտաքին հաղորդակցությունների դեպարտամենտի տնօրեն Ալմաս Սադուբաևը։
«Այսօր Ղազախստանի Հանրապետության ՆԳՆ քրեական ոստիկանության աշխատողները Ռուսաստանի իրավապահ մարմինների հետ գործակցությամբ ՌԴ Օմսկի շրջանում ձերբակալել են Կարագանդայում հունվարի 1–ի լույս գիշերը տեղի ունեցած խուլիգանական գործողությունների և սպանության կատարման կասկածյալ Ն.Գուրուրյանը»,– չորեքշաբթի ասել է Սադուբաևը։
Загружается новость ... "Лево"
Նրա խոսքով, ներկայում օրենսդրությանը համապատասխան լուծվում է Ղազախստանում նրա արտաքսման հարցը։
Հիշեցնենք, որ հունվարի 1–ի գիշերը Կարագանդա քաղաքի «Հին Հռոմ» ռեստորանում կենցաղային հողի վրա տեղի է ունեցել ծեծկռտուք ռեստորանի այցելուների միջև, ինչի հետևանքով տղամարդ է մահացել, երեք մարդ վիրավորվել է։ Ղազախական ԶԼՄ–ների հաղորդմամբ, փաստի առթիվ իրականացվում է նախաքննություն ՔՕ 99–րդ հոդվածի 1–ի մասին հատկանիշներով (սպանություն)։ Կարագանդայի ոստիկանների կողմից հետախուզում է հայտարարվել Գուրուրյան Նարեկի նկատմամբ։
Կարագանդայի մարզի դատախազության մամուլի ծառայությունում հայտնել են, որ «ՎԿոնտակտե» սոցցանցում հայտնաբերվել է մեկնաբանություն, որը բռնության կոչ է անում որոշակի ազգության ներկայացուցիչների նկատմամբ վերոնշյալ դեպքի կապակցությամբ։ Հունվարի 5–ին փաստի առթիվ սկսվել է նախաքննություն «Սպանություն» հոդվածով։ Tengrinews.kz պորտալի հաղորդմամբ, ձերբակալվել է 7 կասկածյալ (նրանցից հինգը կալանավորվել է), մեկ կասկածյալի նկատմամբ հայտարարվել է միջազգային հետախուզում։ Աղբյուրի տվյալներով, Կարագանդայի մարզի ոստիկանությունում սկսվել է նախաքննություն «Սոցիալական, ազգային, տոհմական, ռասայական, հասարակարգային կամ կրոնական թշնամության հրահրում» հոդվածով։
Իրավիճակը մեկնաբանել է նաև Կարագանդայի մարզի աքիմ Եռլան Կոշանովը, ով վստահեցնում է, որ բոլոր մեղավորները կպատժվեն։ Դուրս գալով ցուցարարների մոտ` աքիմը հավաստիացրել է, որ տվյալ գործով քննությունն անձամբ ստանձնել է Ղազախստանի գլխավոր դատախազը։
Հունվարի 6–ին հաղորդվել է, որ Կարագանդայում ցույց է անցկացվել, հունվարի 7–ին Ղազախստանից 23 մարդ է արտաքսվել, իսկ նույն օրը Հայաստանի արտաքին գործերի նախարարությունը հայտարարություն է տարածել` կոչ անելով հասարակությանը չտրվել պոպուլիզմի գայթակղությանը և սադրանքներին Կարագանդայի «Հին Հռոմ» ռեստորանի մոտ տեղի ունեցած սպանությունից հետո։ -0-