Ջրի սակագինը կբարձրանա

ԵՐԵՎԱՆ, 9 դեկտեմբերի. /Նովոստի–Արմենիա/. ՀՀ հանրային ծառայությունները կարգավորող հանձնաժողովը հինգշաբթի կայացած նիստում նոր սակագին է սահմանել ջրամատակարարման միասնական օպերատորի` «Վեոլիա ջուր» (Veolie Generale des Eaux) ընկերության համար։

2017 թվականի հունվարի 1–ից նոր օպերատորը կստանձնի «Երևան Ջուր», «Հայջրմուղկոյուղի», «Նոր Ակունք», «Շիրակ-ջրմուղկոյուղի» և «Լոռի-ջրմուղկոյուղի» ՓԲԸ-ների գույքի կառավարումը։

ՀՀ հանրային ծառայությունները կարգավորող հանձնաժողովի որոշմամբ «Վեոլիա Ջուր» փակ բաժնետիրական ընկերությանը տրամադրվել է խմելու ջրի մատակարարման և ջրահեռացման (կեղտաջրերի մաքրման) ծառայությունների մատուցման լիցենզիա։

ՀԾԿՀ–ի որոշմամբ, «Վեոլիա Ջուր» ՓԲԸ-ի կողմից բաժանորդներին խմելու ջրի մատակարարման և ջրահեռացման (կեղտաջրերի մաքրման) ծառայությունների մատուցման համար սահմանել 180 դրամ/խմ (ներառյալ ԱԱՀ-ն) մեկ խորանարդ մետրի դիմաց 170.256 դրամի փոխարեն։

Միաժամանակ, խմելու ջրի մեծածախ ծառայությունների մատակարարման սակագինը կազմում է 18 դրամ մեկ խմ–ի դիմաց (ներառյալ ԱԱՀ-ն), ջրահեռացման և կեղտաջրերի մաքրման մեծածախ ծառայությունների սակագինը` 36 դրամ/խմ։

«Երևանի Կարեն Դեմիրճյանի անվան մետրոպոլիտենի» ստորգետնյա ջրերի ջրահեռացման սակագինը կազմում է 10.8 դրամ/խմ։

Սահմանված սակագները ուժի մեջ կմտնեն 2017 թվականի հունվարի 1-ից: