ԵՐԵՎԱՆ, 24 մայիսի. /Նովոստի-Արմենիա/. Իսրայելի Քնեսեթի ատգամավորները 16 կողմ ու 10 դեմ ձայների հարաբերակցությամբ հավանություն են տվել Թամար Զանդբերգի առաջարկությանը` օրակարգում ընդգրկել լ Հայոց ցեղասպանության պաշտոնական ճանաչման հարցը, հայտնում է
vesty.co.il-ն:
Հիշեցնենք, որ Իսրայելի խորհրդարանում բազմիցս բարձրացվել է Հայոց ցեղասպանության ճանաչման հարցը: Այսպես, 2018 թ.-ի փետրվարի 18-ին Քնեսեթը մերժել էր Հայոց ցեղասպանության ճանաչման մասին օրինագիծը, որը ներկայացրել էր «Եշ Աթիդ» կուսակցության առաջնորդ Յայիր Լափիդը:
«Մենք պարտավոր ենք կատարել մեր պարտքը` որպես իսրայելցի ու սովորական մարդ: Ես արդեն մի քանի տարի կոչ եմ անում կատարել այդ պարտքը: Կարճ ժամանակահատվածում սպանվել է ավելի քան մեկ միլիոն մարդ: Դա անհավանական չարագործություն է», - ասել է Քնեսեթի նախագահ Յուլի Էդելշթայնը, հայտարարելով, որ Իսրայելը պարտավոր է ճանաչել Հայոց ցեղասպանությունը` անկախ Թուրքիայի հետ հարաբերություններից:
Նա նշեց նաև, որ ամաչում է հասարակական գործիչների ու ընտրված պատգամավորների այն հայտարարություններից, թե Հայոց ցեղասպանության ճանաչումը «մեր պատասխանն է թուրքերին»:
«Ասում են, թե դա իբր արժանի պատասխան կլինի վերջերս Գազայի հատվածում
թուրքական իշխանությունների կողմից նախաձեռնված քայլերի: Արդյո՞ք պատմությունը կապված է Էրդողանի հետ մեր հարաբերություններից», - ասել է նա:
Զանդբերգը նշել է, որ ճանաչման մերժումը ստվերում է Իսրայելի բարոյական կերպարը` հատկապես, որ այդ մերժումը պայմանավորված է քաղաքական գաղափարներով:-0-