Հինգշաբթի` սեպտեմբերի 19–ի առավել ուշագրավ նորությունները

• Այսօր կայացած կառավարության նիստի ընթացքում ՀՀ վարչապետ Նիկոլ Փաշինյանը հայտարարեց ԱԱԾ տնօրենի և ոստիկանապետի ժամանակավոր պաշտոնակատարներ նշանակելու մասին։ «Ես կայացրել եմ որոշում ՀՀ ԱԱԾ տնօրենի տեղակալ Էդուարդ Մարտիրոսյանին ՀՀ ԱԱԾ տնօրենի պարտականությունների ժամանակավոր կատարող նշանակելու վերաբերյալ, և ՀՀ ոստիկանության պետի առաջին տեղակալ Արման Սարգսյանին` ՀՀ ոստիկանության պետի ժամանակավոր պաշտոնակատար նշանակելու վերաբերյալ։ Տեղեկացնեմ, որ ՀՀ օրենսդրությամբ սահմանված կարգավիճակ է սա, և մեր գործընկերներն այդ կարգավիճակում ունեն լիարժեք լիազորություն` ղեկավարելու երկու համակարգերը, և ես ուզում եմ հաջողություն մաղթել և շնորհավորել մեր գործընկերներին։ Այսինքն ֆորմալ առումով մենք սպասում ենք նախագահի կողմից համապատասխան հրամանագրի ստորագրմանը և հրապարակմանը։ Այս պահին կարող ենք մեր գործընկերներին շնորհավորել և հաջողություն մաղթել իրենց առաջիկա գործունեության մեջ», – հայտարարեց ՀՀ վարչապետը։ Ավելի ուշ նախագահը ստորագրեց նրանց այդ պաշտոններում նշանակելու համապատասխան հրամանագրերը։ 

• Հանրապետությունում սպասվում է քամու ուժգնացում: Այդ մասին Facebook-ի իր էջում գրել է ՀՀ ԱԻՆ հիդրոմետ ծառայության օդերևութաբանության կենտրոնի պետ Գագիկ Սուրենյանը: «Անկախության տոնի միջոցառումների հարգելի կազմակերպիչներ, հաշվի կառնեք, որ սեպտեմբերի 21-ին կեսօրից հետո և հատկապես երեկոյան ժամերին հանրապետությունում սպասվում է քամու ուժգնացում, պոռթկումները մինչև 20-25մ/վրկ-ում», - գրել է Սուրենյանը Facebook-ի իր էջում: Հիշեցնենք, որ օդի ջերմաստիճանը սեպտեմբերի 22-23-ն աստիճանաբար կնվազի 9-11 աստիճանով։

• Հայաստանում տեղի ունեցող վերջին զարգացումները վերհանեցին պետական համակարգում և քաղաքական դաշտում առկա ճգնաժամը։ Այս մասին ասվում է «Ժառանգություն» կուսակցության հայտարարությունում։

Կուսակցությունում նշում են, որ ճգնաժամային իրողությունների մասին իրենք քանիցս բարձրաձայնել են, և այժմ ցավով արձանագրում են, որ կուսակցության նախազգուշացումները հին համակարգի ականների մասին իրականություն են դարձել:

«Ժառանգություն» կուսակցությունը համոզմունք ունի, որ Նոր Հայաստանի հեղափոխական արժեքները վտանգվում են, ուստի հանրային վստահության բարձր քվե ստացած վարչապետը պետք է նոր քայլ կատարի և «Կանգ առ՛»-ի ու գալիքի համապատկերում համախմբի ինքնիշխան ու ժողովրդավարական, արդար Հայաստանի արժեհամակարգի դավանորդ քաղաքական ուժերին: 

• Ազգային անվտանգության ծառայության նախկին տնօրեն Արթուր Վանեցյանի հրաժարականի հայտարարությունը շատ է զարմացրել վարչապետ Նիկոլ Փաշինյանին: Այդ մասին լրագրողների հետ զրույցում հայտարարեց ՀՀ վարչապետի մամուլի խոսնակ Վլադիմիր Կարապետյանը:

«Այդ օրը վարչապետը` զգույշ ընտրելով բառերը, խոսել է իր և իր ենթակայի միջև ստեղծված իրավիճակի մասին: Նա ակնարկեց, որ գոյություն ունի երկկողմանի համաձայնություն: Դրանից հետո տարածված հայտարարությունն անսպասելի էր ինչպես վարչապետի, այնպես էլ նրա գործընկերների համար», - ասաց Կարապետյանը:

Միաժամանակ մամուլի խոսնակը զարմանք է հայտնել, որ ԱԱԾ տնօրենի և ոստիկանապետի հրաժարականը անակնկալ դարձավ հասարակության համար:

«ԱԱԾ տնօրենի և ոստիկանապետի հրաժարականները` անցած փուլ է, Հայաստանում ավելի կարևոր հարցեր կան, կան նոր պաշտոնյաներ», - ասաց Կարապետյանը: 

• Հայաստանում կանցկացվի իր մասշտաբներով աննախադեպ ռազմական հավաք: Այդ մասին հինգշաբթի կառավարության նիստում ասաց ՀՀ պաշտպանության նախարար Դավիթ Տոնոյանը:

Ըստ նրա, սեպտեմբերի 24-ից հոկտեմբերից 5-ը կկազմակերպվեն ռազմավարական զորավարժություններ՝ ուսումնական հավաքի ձևաչափով պետական և տեղական ինքնակառավարման մարմինների մասնակցությամբ։

Նախարարը նշեց, որ հավաքն անցկացվում է որոշելու համար պետական կառույցների պատրաստակամությունը և ունակությունը պահեստային և տրանսպորտային միջոցների մոբիլիզացման համար պատերազմի վտանգի դեպքում:

«Հավաքը կկրի ռազմական զորավարժությունների ռազմավարական բնույթ, որը թույլ կտա գնահատել ռազմական անվտանգության համակարգի մոբիլիզացման հնարավորությունները, պարզել նախապատրաստման հարցերը և մեխանիզմներ մշակել մոբիլիզացման արդյունավետությունը բարձրացնելու համար», - ասաց Տոնոյանը: -0-