ԵՐԵՎԱՆ, 28 ապրիլի. /Նովոստի–Արմենիա/. Հայաստանում պարտադիր կուտակային կենսաթոշակային համակարգի ներդրումը կհետաձգվի մեկ տարով` մինչև 2018 թվականի հուլիսը, հինգշաբթի կառավարության նիստում հայտարարեց Հայաստանի վարչապետ Հովիկ Աբրահամյանը, հաղորդում է
«ԱՌԿԱ» գործակալությունը։
Նա նշեց, որ կառավարությունը խորհրդարանի դիտարկմանը կուղղի Հարկային նոր օրենսգիրքը, որը ենթադրում է ծավալուն փոփոխություններ ոչ միայն մոտեցումների մեջ, այլ իրագործման մեխանիզմներում։
Վարչապետն ընդգծեց, որ բոլոր գերատեսչությունները պետք է ծանոթանան այն փոփոխություններին, որոնք ակնկալում է նրանց ոլորտներից, հատկապես հաշվի առնելով նախատեսված ծրագրերը։
«Ծրագրվում է, որ Հարկային օրենսգիրքն ուժի մեջ կմտնի 2018 թվականին, երբ էլ հենց պատրաստ կլինի ծրագրային ապահովումը, ինչի կապակցությամբ նախագահի հետ խորհրդատվություններում և կարևորելով կուտակային բարեփոխումների սահուն և անխափան ներդրումը, առաջարկվում է հետաձգել սոցիալական վճարների իրագործման նկատմամբ պարտադիր պահանջի ներդրումը մեկ տարով` այն տեղափոխելով այն 2018 թվականի հուլիսի մեկին»,– ասաց Աբրահամյանը։
Այս կապակցությամբ նա հանձնարարեց նախապատրաստել համապատասխան օրինագիծ, որը պետք է ներկայացվի կառավարության դիտարկմանը հաջորդ նիստում։
Հայաստանի պետեկամուտների կոմիտեի նախագահի տեղակալ Վախթանգ Միրումյանը լրագրողներին իր հերթին ասաց, որ հետաձգումը պայմանավորված է Հարկային նոր օրենսգրքում նախատեսված մեխանիզմներով, որոնք լիարժեք կսկսեն գործել 2018 թվականից։
«Այս իմաստով աննպատակահարմար է պարտադիր բաղադրիչի ներդրումը նախքան Հարկային օրենսգրքի` ուժի մեջ մտնելը»,– ասաց Միրումյանը։
Օրենքով, պարտադիր կուտակային կենսաթոշակային համակարգի գործողությունը պետք է ուժի մեջ մտներ 2014 թվականի հունվարի 1–ից 1974 թվականի հունվարի 1–ից հետո ծնված բոլոր քաղաքացիների համար։ Սակայն հասարակական բողոքների ճնշման ներքո Սահմանադրական դատարանը սկզբում որոշում ընդունեց այն Սահմանադրությանը չհամապատասխանող և անվավեր ճանաչել «Կուտակային թոշակների մասին» օրենքի մի շարք դրույթներ, իսկ այնուհետև 2014 թվականի հունիսի 21–ին խորհրդարանն ընդունեց օրենսդրական լրացումներ, որոնց համաձայն, 2014 թվականի հուլիսի 1–ից պարտադիր կուտակային կենսաթոշակային համակարգը գործում է պետական կազմակերպությունների աշխատակիցների համար։
Մասնավոր հատվածի համար համակարգը սկզբում ներդրվում է ըստ ցանկության և գործում երեք տարի, իսկ այդ ժամկետը լրանալուն պես պարտադիր բաղադրիչը տարածվում է նաև նրանց վրա։ -0-