ՀՀ նախագահը վետերաններին՝ ոչ ոքի թույլ չենք տա աղավաղել պատմությունը

ԵՐԵՎԱՆ, 9 մայիսի. /Նովոստի-Արմենիա/. Հայաստանի նախագահ Սերժ Սարգսյանը երկուշաբթի Հայրենական մեծ պատերազմի վետերանների հետ հանդիպմանն ասաց, որ ոչ ոքի թույլ չի տրվի խեղաթյուրել պատմությունը։

«Մենք երբեք մեր երկրում թույլ չենք տա արտագրել պատմությունը, աղավաղել իրադարձությունները։ Սա մեր ընդհանուր հաղթանակն է»,- ասաց Սարգսյանը՝ օղու սիմվոլիկ գավաթ բարձրացնելով Հաղթանակի այգու դաշտային խոհանոցում։

«Ցանկանում եմ հավաստել, որ այնպես, ինչպես դուք պաշտպանել եք ձեր, մեր մեծ Հայրենիքը, այնպես էլ նոր սերունդը կպաշտպանի մեր փոքրիկ, բայց շատ թանկ Հայրենիքը»,- ավելացրեց նախագահը։
Ըստ նրա, հաղթանակներն անարդար են լինում, երբ ինչ-որ մեկը հավակնում է ուրիշի հողին, և արդար են լինում։ «Ձեր հաղթանակն արդար է։ Այն ստիպել է ձեզնից հետո եկող շատերին լինել ձեր պես։ Դա շատ ավելի կարևոր է։ Երախտապարտ եմ ձեզ»,- նշեց նա։

Մայիսի 9-ին Հայաստանում և Լեռնային Ղարաբաղի Հանրապետությունում եռատոն է՝ Հայրենական մեծ պատերազմում տարած Հաղթանակի օրը, ԼՂՀ Պաշտպանության բանակի ստեղծման 24-րդ տարեդարձը և Շուշի քաղաքի ազատագրման օրը։

Եռատոնի կարևորագույն բաղկացուցիչներից է Շուշիի ազատագրումը1994 թ.–ի մայիսի 9–ին, որը բեկումնային էր արցախյան ազատամարտում։ Անառիկ ամրոցի ազատագրումը մեծ ազդեցություն ունեցավ արցախյան ազատամարտի ողջ ընթացքի վրա։

Արցախյան ազատամարտի հերոսներին, իրավամբ, համարում են Հայրենական պատերազմի մասնակիցների իրավահաջորդներ։

Հայրենական պատերազմի տարիներին Կարմիր բանակի շարքեր է զորակոչվել ավելի քան 500 հազար հայ, ովքեր տոկոսային հարաբերակցությամբ կրել են ամենամեծ կորուստը։ Մոտավորապես ամեն երկրորդ հայը չի վերադարձել մարտի դաշտից։

Ռազմական սխրագործության համար ավելի քան 70 հազար հայեր արժանացել են բարձր պետական մրցանակների, այդ թվում` Խորհրդային Միության Հերոսի կոչման։ Պատերազմի տարիներին այդ կոչմանն է արժանացել 104 հայազգի խորհրդային մարտիկ, որոնցից 38–ը` հետմահու։ Խորհրդային Միության հերոսների թվում են եղել ճակատի հրամանատար, բանակի գեներալ Ի. Բաղրամյանը (բոլոր զինվորական կոչումները շնորհվել են պատերազմի ավարտից հետո. խմբագրություն), հրաձգային կորպուսի հրամանատար, գեներալ–լեյտենանտ Ս.Ս. Մարտիրոսյանը, տանկային կորպուսի հրամանատար, գեներալ–մայոր Ա. Հ. Բաբաջանյանը, հրաձգային դիվիզիայի հրամանատարներ Ա. Գ Բաբայանը, Բ. Ա. Վլադիմիրովը, Ա. Ա. Ղազարյանը, Ա. Գ Կարապետյանը, հրաձգային գնդի հրամանատար, փոխգնդապետ Գ. Կ. Բաղյանը, տանկային գումարտակի հրամանատար, կապիտան Ա. Վ. Ղազարյանը, ավիացիոն գնդի հրամանատարի օգնական, կապիտան Ա. Բ. Մանուկյանը, ավիացիոն էսկադրիլիայի շտուրման, մայոր Ա. Դ. Կասպարովը, հրաձգային գումարտակի կազմակերպիչ, լեյտենանտ Ֆ. Ի. Սարկիսովը, հրետանային գնդի հրամանատար, կապիտան Կ. Ա. Նազարովը (Նազարյան), ականանետային գնդի հրամանատար, լեյտենանտ Գ. Բ. Վարտումյանը, տանկային վաշտի հրամանատար, ավագ լեյտենանտ Ա. Ա. Ամատունին, ավտոմատավորների առանձին դասակի հրամանատար, ավագ սերժանտ Ա. Ռ. Մկրտչյանը, կապի դասակի հեռախոսավար, եֆրեյտոր Ս. Ա. Սարգսյանը, գվարդիայի հրաձիգ–ավտոմատավոր, կարմիրբանակային Ս. Ս. Չիլինգարյանը և շատ այլ հերոսներ։

Պատերազմի տարիներին Խորհրդային Միության կրկնակի հերոս է դարձել հայտնի խորհրդային ռազմիկ, Բալթյան նավատորմի Թեոդոսիայի 47–րդ գրոհային ավիացիոն գնդի հրամանատար, փոխգնդապետ Ն. Գ. Ստեփանյանը։
Բացի այդ, 27 հայեր դարձել են Փառքի շքանշանի ասպետ, որոնց թվում են հրանոթային անձնակազմի հրամանատար, ավագ սերժանտ Վ. Կ. Աբրահամյանը, ավտոմատավորների ստորաբաժանման հրամանատար, ավագ Ն. Ա. Ավետիսյանը, գվարդիայի ականանետային վաշտի հրամանատար, սերժանտ Գ. Ա. Գրիգորյանը, գվարդիայի ավտոմատավորների ստորաբաժանման հրամանատար, սերժանտ Վ. Ա. Դալաքյանը, գվարդիայի հրանոթային անձնակազմի հրամանատար, եֆրեյտոր Գ. Ա. Մելիքսեթյանը, սակրավորների վաշտի ստորաբաժանման հրամանատար, կրտսեր սերժանտ Պ. Ս. Օսկայանը, գվարդիայի տանկային վաշտի ստորաբաժանման հրամանատար, սերժանտ. Ս. Բ. Ստեփանյանը, առանձին հետախուզական վաշտի հետախույզ, եֆրեյտոր Ա. Վ. Շուշանյանը և այլ հերոսներ։