ԵՐԵՎԱՆ, 19 մարտի./Նովոստի–Արմենիա/. ՀՀ վարչապետ Նիկոլ Փաշինյանը երեքշաբթի ասուլիսի ժամանակ խոսել է պետական տրանսպորտային միջոցների օգտագործման մասին։
Վարչապետը, մասնավորապես, անդրադարձել է ուղղաթիռի շահագործման հարցին, որը քննարկումների առիթ էր դարձել հասարակության շրջանում։
«Մեր իրականության մեջ նոր խորհրդանիշ է հայտնվել` ուղղաթիռ։ Վատ լուր հայտնեմ մտահոգ մարդկանց համար։ Այդ ուղղաթիռը, որն աշխատանքային է վարչապետի համար, ունի պարտադիր թռիչքային ժամեր։ Դա նշանակում է. որպեսզի տեխնիկական չվերածվի մետաղաջարդոնի, այն ունի պարտադիր թռիչքային ժամեր, և եթե անգամ վարչապետը չի նստում ուղղաթիռ, այն պարտավոր է դատարկ օդ բարձրանալ և թռչել», – նշեց ՀՀ վարչապետը։
Կառավարության ղեկավարը նաև նշեց, որ նույնը վերաբերում է ինքնաթիռին։
Խոսելով ավտոմեքենաների մասին` Փաշինյանը հայտարարեց, որ օգտագործում է 2008թ.–ին նախկին նախագահ Սերժ Սարգսյանի համար ձեռք բերված ավտոմեքենան, որը հետագայում ճանաչվել էր ոչ պիտանի։
«
Հեծանիվ եմ քշում, ասում են` «վայ, հեծանիվ է քշում», ոտքով եմ քայլում, պոպուլիստ են անվանում, մեքենայով եմ երթևեկում, զարմանում են մեքենայի վրա», – նշեց նա։–0–