Հայաստանը 7 ոսկե մեդալով 2–րդ տեղն է զբաղեցրել Դելֆյան խաղերում

ԵՐԵՎԱՆ, 26 ապրիլի. /Նովոստի-Արմենիա/. Հայաստանի ներկայացուցիչները 16 մեդալ են նվաճել ԱՊՀ անդամ պետությունների Դելֆյան 12–րդ երիտասարդական խաղերում, չորեքշաբթի մամուլի ասուլիսում ասաց Հայաստանի մշակույթի փոխնախարար Արթուր Պողոսյանը։

Դելֆյան 12–րդ խաղերն անցկացվել են ապրիլի 18–23–ը Եկատերինբուրգում։ Խաղերին մասնակցել են Բելառուսի, Ղազախստանի, Ղրղըզստանի, Մոլդովայի, Ռուսաստանի, Տաջիկստանի և այլ երկրների ներկայացուցիչները:

«Մեր սաների կատարողական արվեստը ցնցեց մրցույթի ժյուրիին: Հայաստանը այս խաղերին գրանցեց իր լավագույն արդյունքը` 7 ոսկե, 5 արծաթե և 4 բրոնզե մեդալներ», - հայտարարեց Պողոսյանը` ավելացնելով, որ թիմային հաշվարկում Հայաստանը զբաղեցրել է երկրորդ տեղը` Ռուսաստանից հետո:

Նրա խոսքով, Դելֆյան խաղերը մշակույթի ոլորտում յուրօրինակ Օլիմպիական խաղեր են, որոնց մացնակցում են մինչև 25 տարեկան երեխաներ և պատանիներ:

Հայաստանը մասնակցում է երիտասարդական Դելֆյան խաղերին 2002 թ.-ից: 2017 թ.-ին Եկատերինբուրգում Հայաստանը ներկայացնում էին 29 մասնակից 11 անվանակարգերում:

Հայաստանի ներկայացուցիչները արժանացել են բարձրագույն մրցանակների «Դաշնամուր», «Ազգային գործիք», «Ժողովրդական երգեցողություն», «Գեղանկար», «Ակադեմիական երգեցողություն» անվանակարգերում: Մեդալներ նվաճած հայ մասնակիցները արժանացել են ՀՀ մշակույթի նախարարության դիպլոմների: -0-