ԵՐԵՎԱՆ, 24 հուլիսի. /Նովոստի–Արմենիա/. Ապագա երեխայի սեռով պայմանավորված կանխակալ ընտրության խնդիրը Հայաստանում դեռ արդիական է և կարող է անմիջական ազդեցություն ունենալ երկրի ազգային անվտանգության վրա, կարծում է «Մարդկային զարգացման միջազգային կենտրոն» ՀԿ գործադիր տնօրեն Արմեն Գալստյանը։
«ՄԱԿ–ի 2011 թ–ի հետազոտությունը ցույց է տվել, որ Հայաստանում արդիական է սելեկտիվ աբորտների խնդիրը, հատկապես մարզերում, որտեղ տղաների և աղջիկների հարաբերակցությունը 124-ը 100–ի է, մինչդեռ բնական է համարվում 102-106 տղաների և 100 աղջկա հարաբերակցությունը»,–երկուշաբթի հրավիրված ասուլիսում ասաց նա։
2015-17 թթ. ծրագրի շրջանակում անցկացված հետազոտությունը 2011թ–ի համեմատ այս հարցում դրական միտումներ է ցույց է տվել։
Նրա խոսքով, հետազոտության մեջ ներգրավվել է շուրջ 34 քաղաքի վերարտադրողական տարիքի 1920 կին։ «Իհարկե, հարցման ընթացքում հաշվի է առնվել հարցվողի տարիքն ու կրթությունը»,–նշել է նա։
«Մարդկային զարգացման միջազգային կենտրոն» ՀԿ զարգացման և հետազոտությունների բաժնի ղեկավար Վահան Ասատրյանը նշեց, որ 2011 թ–ին կանանց 60 տոկոսը նշում էր, որ նախապատվություն է տալիս արական սեռի երեխայի ծնվելուն։ Սակայն 2017 թ–ին այդ մասին հայտարարել է միայն կանանց 37 տոկոսը։
Загружается новость ... "Лево"
«Հարցվողներին նաև հարցրել են արդեն ընտանիքում տղաներին նախապատվություն տալու մասին։ Եթե 2011 թ–ին կանանց 41 տոկոսն էին նշում, որ իրենց ընտանիքում նախապատվությունը տալիս են որդու ծնվելուն, ապա արդեն 2017 թ–ին այդ մասին հայտնել է կանանց միայն 12 տոկոսը»,–ասաց նա։
Նրա խոսքով, այս հարցումը ցույց է տալիս, որ կանայք հասարակության կողմից ավելի շատ են ճնշումների ենթարկվում, քան ընտանիքում։
Ասատրյանը նաև նշեց, որ ավելի շատ ընտանքիներ են դադարում նախապատվություն տալ երեխայի կոնկրետ սեռին, ինչը նույնպես դրական միտում է։ -0-