ԵՐԵՎԱՆ, 26 ապրիլի. /Նովոստի-Արմենիա/. Հայաստանում ԱՄՆ դեսպանատունը մեկնաբանել է օտարերկրացիներին աշխատանքային արտոնագրերի տրամադրման կարգի մասին տեղեկությունը։
Ինչպես «Նովոստի–Արմենիա» գործակալությանը հայտնեցին Դեսպանության մամուլի ծառայությունից, ԱՄՆ նախագահ Դոնալդ Թրամփի հրամանագրի համաձայն, պետքարտուղարը, արդարադատության, աշխատանքի և ազգային անվտանգության քարտուղարները հանձնարարական են ստացել մշակել առաջարկներ՝ որոշակի աշխատատեղեր ժամանակավորապես օտարերկրացի ոչ-ներգաղթյալ կադրերով համալրելու H-1B վիզաների ծրագրում բարեփոխումներ կատարելու վերաբերյալ: Թրամփի հրամանագրին համապատասխան, ծրագիրը մանրամասն կուսումնասիրվի, և համապատասխան բարեփոխումներ կառաջարկվեն։
«Այս վիզաների համար դիմելու կամ դրանց տրամադրման ընթացակարգերում այս պահին ամեն ինչ մնում է անփոփոխ: Ծրագրի վերանայման արդյունքների մասին Պետքարտուղարությունը նախապես ոչինչ չի կարող ասել: Եթե ապագայում ծրագրում փոփոխություններ լինեն, ապա այդ մասին կլինի համապատասխան հայտարարություն Պետքարտուղարության կողմից»,– ասել են Երևանում ամերիկյան դիվանագիտական առաքելությնում։
ԶԼՄ–ները հայտնում էին, որ ավելի վաղ ԱՄՆ նախագահ Դոնալդ Թրամփը հրամանագիր է ստորագրել օտարերկրացի բարձրակարգ աշխատողների վարձակալության համար օգտագործվող աշխատանքային ժամանակավոր վիզաների բաշխման ծրագրի վերանայման մասին։ Նշվում էր, որ նոր հրամանագիրը նախատեսում է օտարերկրացիներին աշխատանքային վիզաներ տրամադրելու կարգը խստացնելու վերաբերյալ քայլեր ձեռնարկել։ -0-
Ծանոթացեք լուրերին առաջինն ու քննարկեք դրանք մեր Telegram-յան ալիքում