ԵՐԵՎԱՆ, 12 հոկտեմբերի. /Նովոստի–Արմենիա/. Հայաստանը ծխող բնակչության թվով առաջատարն է եվրոպական երկրների թվում, չորեքշաբթի լրագրողներին ասաց Հայաստանի սպառողների ասոցիացիայի ղեկավար Արմեն Պողոսյանը։
«Թեև Հայաստանում հոկտեմբերի 12–ին նշվում է Ծխախոտի դեմ պայքարի ազգային օրը, այդ պայքարն իրականում միֆ է։ Անհրաժեշտ է անցնել ավելի վճռական քայլերի, մասնավորապես, կանխարգելիչ բնույթի»,ճ ասաց Պողոսյանը։
Ըստ նրա, ավելի արդյունավետ կարելի է պայքարել ծխելու դեմ` կառուցելով նոր լողաբազաններ և ֆինտես ակումներ, քարոզելով առողջ ապրելակերպ։
Ուռուցքաբան Արամ Բադալյանը կարևորեց այդ խնդիրը Հայաստանի համար։
«Հայաստանում թոքի քաղցկեղով հիվանդների 80 տոկոսն ավելի քան 10 տարվա ծխողներ են։ Կոկորդի քաղցկեղով հիվանդների թիվը 2015 թվականին բնակչության 100 հազարին բաժին է ընկել 3.2 դեպք։ Ընդ որում` հիվանդների 85 տոկոսը մահանում է այդ հիվանդության ախտորոշումից հինգ տարի անց»,– ասաց Բադալյանը։
«Սոցիոմետր» սոցիոլոգիական հետազոտությունների կենտրոնի տնօրեն Ահարոն Ադիբեկյանն իր հերթին նշեց, որ սոցիոլոգիական տվյալների համաձայն, Հայաստանում ծխում է արական սեռի բնակչության կեսը։
«Խորհրդային ժամանակաշրջանի համեմատ մի քանի անգամ ավելացել է ծխող կանանց թիվը։ Կրծքագեղձի քաղցկեղով հիվանդացության կտրուկ աճը վերջին տարիներին բացատրվում է, ամենայն հավանականությամբ, հենց այդ հանգամանքով»,– ասաց Ադիբեկյանը։
Ավելի վաղ Ադիբեկյանն ասել էր, որ Հայաստանում ծխում է բոլոր կանանց մոտ 6 տոկոսը, տվյալ ցուցանիշը ԽՍՀՄ–ի տարիներից կրկնակի աճել է։ Սոցիոլոգի տվյալներով, նախորդ տարի Հայաստանում մահացել է մոտ 28 հազար մարդ, նրանցից 21 հազարը կամ ավելի քան 75 տոկոսը հիմնականում մահացել են ծխելու հետևանքով առաջացած հիվանդություններից` սիրտ–անոթային հիվանդություններից, չարորակ ուռուցքներից և տուբերկուլյոզից։ -0-
Ծանոթացեք լուրերին առաջինն ու քննարկեք դրանք մեր Telegram-յան ալիքում