Հայաստանի բնակչության մոտ 5% տառապում է ընկճախտով

ԵՐԵՎԱՆ, 8 ապրիլի. /Նովոստի-Արմենիա/. Հայաստանի բնակչության մոտ 5 տոկոսն ընկճախտով է տառապում, նախօրեին լրագրողներին ասել է հանրապետության գլխավոր հոգեբույժ Սամվել Թորոսյանը:

«Հստակ վիճակագրություն չունենք, քանի որ մարդիկ բժիշկի են դիմում միայն ծանր դեպքերում, որոնք ուղեկցվում են սուիցիդալ մտադրություններով: Բայց կարծում եմ, որ Հայաստանում դեպրեսիայով տառապող մարդկանց թիվը նույնն է, ինչ ողջ աշխարհում, պլյուս/մինուս 2-2,5 տոկոս»,- ասել է Թորոսյանը:

Նրա խոսքով, 2016 թվականին հոգեբույժներին Հայաստանում դիմել է ընկճախտի ծանր տեսակով տառապող 180 մարդ:

Մասնագետի կարծիքով, մինչև 2020 թվականն ընկճախտն աշխարհում կզբաղեցնի հաշմանդամության հասցնող հիվանդությունների թվում երկրորդ տեղը: «Ներկայում արդեն 300-350 միլիոն մարդ տառապում է դեպրեսիայով»,- ասել է Թորոսյանը:

Նա հիշեցրել է, որ ընկճախտը կարող է ընթանալ երեք ձևերով՝ թեթև, միջին և ծանր: Ուղեկցվում է, հիմնականում, քնի խախտումներով, ախորժակի, հիշողության անկումով, սեռական ցանկության նվազմամբ, մտավոր գործընթացների դանդաղմամբ:

«Ընկճախտով տառապող մարդուն այցելում են գոյության անպետքության և ինքնասպանության մտքեր: Նա պասիվություն է դրսևորում և խուսափում է շփումից: Դեպրեսիան հաճախ զուգորդվում է ծանր հիվանդություններով»,- նշել է Թորոսյանը:

Որպես բուժում նա նշել է հոգեսոցիալ բուժումը, հոգեթերապիան և դեղորայքային բուժումը, հիշեցնելով, որ այդ հիվանդության բուժումը Հայաստանում իրականացվում է անվճար՝ պետպատվերի շրջանակում: -0-