ԵՐԵՎԱՆ, 8 նոյեմբերի. /Նովոստի–Արմենիա/. ՀՀ քննչական կոմիտեի ԶՔԳՎ իններորդ կայազորային քննչական բաժնում քննվող քրեական գործով ձեռնարկվում են անհրաժեշտ քննչական գործողություններ՝ 2018 թվականի նոյեմբերի 7-ին Որոտան-Խնձորեսկ ավտոճանապարհին տեղի ունեցած ավտովթարի բոլոր հանգամանքները, պատճառները պարզելու ուղղությամբ։
Նախօրեին ժամը 13։00–ի սահմաններում զորամասերից մեկի «ԿամԱզ» ավտոմեքենան Որոտան–Խնձորեսկ ճանապարհի 5–րդ կիլոմետրում դուրս է եկել ճանապարհի երթևեկելի մասից և
գլորվել է ձորը։ Վթարի հետևանքով զոհվել է չորս զինծառայող, 22–ը` հոսպիտալացվել։
Ինչպես հայտնում է Հայաստանի Քննչական կոմիտեն Facebook–ի իր էջում, դեպքի վայր մեկնած քննչական-օպերատիվ խումբը կատարել է դեպքի վայրի զննություն, հետազոտությունների համար վերցրել տարբեր նմուշներ, հարցաքննել ականատես անձանց։
Քրեական գործով մշակվել են աշխատանքային վարկածներ, որոնցից յուրաքանչյուրն ստուգելու ուղղությամբ ձեռնարկվում են անհրաժեշտ գործողություններ, այդ թվում՝ պահանջվել և ստացվել են անհրաժեշտ փաստաթղթեր, կատարվել մի շարք հարցումներ։
«Վթարի պատճառները պարզ կդառնան դատաավտոտեխնիկական փորձաքննության արդյունքում, ինչի պատշաճ իրականացումն ապահովելու համար ձեռք են բերվում անհրաժեշտ բոլոր ելակետային տվյալները՝ փորձագետներին տրամադրելու համար»,– նշվում է հաղորդման մեջ։
Նշանակվել են դատաբժշկական փորձաքննություններ։
Քննությունը կատարվում է ՀՀ քննչական կոմիտեի ԶՔԳՎ իններորդ կայազորային քննչական բաժնում ՀՀ քրեական օրենսգրքի 377-րդ հոդվածի 3-րդ մասով (Մեքենաներ վարելու կամ շահագործելու կանոնների խախտելը, որն անզգուշությամբ հանգեցրել է երկու և ավելի անձանց մահվան)։
Ավելի վաղ ՊՆ–ն հայտնել է զոհվածների անունները` Հայրապետ Նաիրյան, Հրանտ Գասպարյան, Էդգար Հունանյան, Դավիթ Մելքոնյան։ Տուժածների անուններն ու զինվորական կոչումները` կապիտան Գևորգ Մուրադյան, կրտսեր սերժանտներ Կարեն Անտոնյան, Արթուր Սարգսյան, Անատոլի Ռուստոմյան, Սամվել Ավետիսյան, Սասուն Հովհաննիսյան, Հովհաննես Հովհաննիսյան, շարքայիններ Արամ Դավեյան, Մամիկոն Աբգարյան, Գեղամ Յակուբով, Ալիկ Մանուչարյան, Մելս Հրաչյան, Վաչագան Մանուչարյան, Արման Մովսիսյան, Արսեն Թորոսյան, Կարեն Մինասյան, Տարոն Մանուկյան և Առաքել Խաչատրյան։ -0-
