ԵՐԵՎԱՆ, 25 հունվարի. /Նովոստի–Արմենիա/. Հայ բլոգեր և մեդիափորձագետ Տիգրան Քոչարյանն առաջարկում է լքել սոցցանցերն ընտրությունների նախաշեմին։
Ըստ նրա, ապրիլին Հայաստանում կայանալիք խորհրդարանական ընտրությունների հետ կապված ֆեյքերի աննախադեպ աճ կդիտվի սոցցանցերում։
Նա նշեց, որ, ի տարբերություն նախորդ ընտրությունների, ներկայիս քարոզարշավի ընթացքում կուսակցությունների միջև տեղեկատվական լուրջ պայքար է սպասվում։
«Ակտիվ պայքար է սպասվում, որում կօգտագործվեն ոչ միայն ֆեյքեր, այլ նաև տեղեակատվական գրոհներ տարբեր կայքերի, այդ թվում` Facebook–ի վրա։ Այդ պատճառով խորհուրդ եմ տալիս բոլորին, ովքեր չեն ցանկանում կորցնել իրենց հաշիվները, «անջատեն» Facebook–ը և զբաղվել սեփական գործերով, այնտեղ վերադառնալ ավելի ուշ, քանի որ նախընտրական ժամանակահատվածում այն լի կլինի տեղեկատվական կեղծիքներով և փոխադարձ վիրավորանքներով»,– չորեքշաբթի լրագրողներին ասաց Քոչարյանը։
Միաժամանակ, նա նշեց, որ այդ ժամանակահատվածում սպասվում է նաև կեղծ տեղեկատվության ակտիվացում ադրբեջանական ռեսուրսներից, և կոչ արեց հայկական ԶԼՄ–ներին ջուր չլցնել հակահայկական քարոզչության ջրաղացին և չստուգված տվյալներ չտարածել։
«Ապրիլյան իրադարձությունների ժամանակ հայկական տեղեկատվական դաշտը բավականին համերաշխ աշխատեց` կանխելով ադրբեջանական տեղեկատվության ներթափանցումը հայկական շուկա, բայց այժմ շատերը կորցրել են զգոնությունը և պարբերաբար արտահոսքեր են թույլ տալիս»,– ասաց Քոչարյանը։
Փորձագետի խոսքով, նախընտրական արշավի ֆոնին ադրբեջանական ռեսուրսները կրկին կսկսեն հակահայկական քարոզչություն` Հայաստանի քաղաքական դաշտի վրա ազդեցություն գործելու և ներքին քաղաքական հարցերի լուծման համար, այդ թվում հայկական իշխանությունների դեմ պայքարի մասով, ինչն անընդունելի է։
Խորհրդարանական ընտրությունները Հայաստանում կանցկացվեն ապրիլի 2–ին։ -0-
Ծանոթացեք լուրերին առաջինն ու քննարկեք դրանք մեր Telegram-յան ալիքում