ԵՐԵՎԱՆ, 4 մարտի./Նովոստի–Արմենիա/. Հայաստանի ԱԺ նախկին փոխխոսնակ, արդարադատության նախկին նախարար Արփինե Հովհաննիսյանը Facebook–ի իր էջում հրապարակել է փաստաթուղթ, որը, ըստ նրա, ուղղել են փոխվարչապետ Մհեր Գրիգորյանը և ֆինանսների նախարար Ատոմ Ջանջուղազյանը վարչապետ Նիկոլ Փաշինյանին։
Փաստաթուղթը պարունակում է հայեցակարգային մտքեր և առաջարկություններ, որոնք վերաբերում են պետական ապարատի գործունեության օպտիմալացման գործընթացին։ Սակայն Հովհաննիսյանն ուշադրություն է հրավիրել այն կետին, որն անդրադառնում է կրճատումներին և տվյալ քայլերի հնարավոր սոցիալական հետևանքներին։
Փաստաթղթի բովանդակությունը
«Կառավարման համակարգը պետք է արագ և արմատապես փոխվի, հարկ է անհապաղ դադարեցնել այն կազմակերպությունների և պաշտոնյաների գործունեությունն ու գործառույթները, որոնք չեն ապահովում հավելյալ արժեք` հանրային բարիքի արդյունավետ, օգտավետ և խնայողական օգտագործում»,– նշվում է փաստաթղթում։
Նշվում է, որ նման պաշտոնյաների և պաշտոնյաների առկայությունը շատ ավելի մեծ վտանգ է հասարակության համար, քան նրանց կրճատման արդյունքում հնարավոր ռիսկերը։
«Նույնիսկ եթե 10 հազար հավելյալ արդյունք չստեղծող հանրային ծառայողներ դառնան գործազուրկ, ապա դրանից շահելու է հայոց պետականությունը և ամբողջ հասարակայնությունը` մոտ 3 մլն ՀՀ քաղաքացիներ»,– ասվում է փաստաթղթում։
Գրված է, որ օրակարգայինը ոչ թե միջոցների խնայումն է, հաստիքների և պետական մարմինների թվի կրճատումը, այլ պատասխանատվության հստակեցումը և ռեսուրսների դիմաց առավելագույն արդյունքի ստացումը։
Մեծ թափով օպտիմալացում
Պետական համակարգի գործունեության արդյունավետության բարձրացումն ի սկզբանե նոր իշխանությունների գերակայություններից է։ Այս ուղղությամբ առավել խոշոր նախագիծը կառավարության կառուցվածքի բարեփոխումն է։
Ինչպես հայտնում են հայկական լրատվամիջոցները, կառավարությունն արդեն ներկայացրել է «Կառավարության կառուցվածքի մասին» օրենքի փոփոխությունների և լրացումների օրինագծի նախնական տարբերակը։ Այդ փոփոխությունների համաձայն, կառավարությունը բաղկացած կլինի վարչապետից, երկու փոխվարչապետներից և 12 նախարարություններից։
Ակնկալվում է, որ էապես կընդլայնվեն Տարածքային կառավարման և զարգացման նախարարության լիազորությունները, դրան կմիանա Էներգետիկ ենթակառուցվածքների և բնական պաշարների, կապի և տրանսպորտի ոլորտի նախարարությունը, ինչպես նաև Ջրային տնտեսության պետական կոմիտեն։ Էկոնոմիկայի նախարարությունը կմիավորվի Գյուղատնտեսության նախարաարության հետ, իսկ Բնապահպանության նախարարությունը կվերանվանվի Շրջակա միջավայրի նախարարության։ Սփյուռքի նախարարության փոխարեն կձևավորվի վարչապետին առընթեր Սփյուռքի հարցերով գլխավոր հանձնակատարի գրասենյակ։ -0-
Ծանոթացեք լուրերին առաջինն ու քննարկեք դրանք մեր Telegram-յան ալիքում
