ԵՐԵՎԱՆ, 24 մայիսի. /Նովոստի-Արմենիա/. Սոթքի հանքում արտադրությունը կանգ է առել մի խումբ կողմնակի անձանց գործողությունների պատճառով, հայտնում է «ԳեոՊրոՄայնինգ գոլդ» ընկերության մամուլի ծառայությունը։
«ԳեոՊրոՄայնինգ գոլդ» –ը Հայաստանում շահագործում է Սոթքի հանքը և Արարատի ոսկու կորզման ֆաբրիկան, ինչպես նաև Ագարակի պղնձա-մոլիբդենային կոմբինատը
«Մասնավորապես, մայիսի 17-18-ը, ինչպես նաև մայիսի 22-ից մինչև այսօր մի խումբ անձինք, իրենց գործողությունները մոտիվացնելով քաղաքական և ազգայնական լոզունգներով, փակել են դեպի հանք տանող ճանապարհները և տեխնիկայի մուտքը դեպի վառելիքա-քսայուղային նյութերի կայան։ Նրանք փակել են նաև Սոթք-Արարատ երկաթուղային ճյուղ տանող ճանապարհը, որով իրականացվում է հանքաքարի ամենօրյա փոխադրումը Սոթքի հանքից դեպի Արարատի ֆաբրիկա»,– նշվում է հաղորդման մեջ։
Ըստ հաղորդագրության, հանքաքարի արդյունահանման դադարեցումը հանգեցրել է «Հարավ-կովկասյան երկաթուղի» ՓԲ ընկերության կողմից շահագործվող Սոթք-Արարատ երկաթուղային ճյուղի պարապուրդի։ Ճյուղն ապահովում է նրա հասույթի գրեթե կեսը։ Ստեղծված իրավիճակում «ԳեոՊրոՄայնինգ գոլդ» ընկերությունը ստիպված կանգնեցրել է նաև արտադրությունը Արարատի ոսկու կորզման ֆաբրիկայում։
«Արտադրության սաբոտաժի մասնակիցները առաջ են քաշում տարբեր ուլտիմատիվ ազգայնական պահանջներ և ընկերության ղեկավարությանը ու աշխատողներին ենթարկում շանտաժի, հնչեցնում սպառնալիքներ։ Սակայն բողոքողների իրական նպատակն այն է, որպեսզի «ԳեոՊրոՄայնինգ գոլդ» ընկերության ղեկավարությունը թույլատրի նրանց մուտքը հանքի տարածք՝ ոսկու անօրինական արդյունահանում իրականացնելու համար»,– նշվում է հաղորդագրության մեջ։
Ընկերությունն այս հարցով դիմել է Ոստիկանություն, սակայն ոստիկանությունը չի միջամտում իրավիճակին, բացատրելով իր քայլը նրանով, որ բողոքի ակցիաները խաղաղ բնույթ են կրում, և իրավապահ մարմինները իրավասու չեն տվյալ իրավիճակում որևէ բան ձեռնարկել։
Ընկերությունից հիշեցնում են, թե ինչպիսի պայմաններում է ձեռք բերվել արտադրական համալիրը։
«2007թ․ «ԳեոՊրոՄայնինգ» ընկերությունների խումբը սույն արտադրական կոմպլեքսը ձեռք բերեց աղետալի վիճակում՝ պետության և աշխատանքային կոլեկտիվի նկատմամբ ունեցած պարտքերով»,– նշվում է հաղորդագրության մեջ։
Հայաստանում աշխատանքի 10 տարիների ընթացքում Ընկերությունը ձեռնարկության զարգացման և արդիականացման ուղղությամբ ներդրել է ավելի քան 505 միլիոն ԱՄՆ դոլար` դառնալով ՀՀ տնտեսության խոշորագույն ներդրողներից մեկը։
Загружается новость ...
"Право"
«Արդյունքում, այսօր ընկերության աշխատողների թիվը հասնում է 2000-ի, իսկ Հայաստանի բյուջե վճարվող հարկերը անցնում են 200 միլիոն ԱՄՆ դոլարը։ Միայն 2017 թվականին ԳեոՊրոՄայնինգը պետական բյուջե է վճարել մոտ 27 միլիոն ԱՄՆ դոլար և ընդգրկվել երկրի հինգ խոշոր հարկ վճարողների թվում»,– ընդգծվում է հաղորդագրության մեջ։
«ԳեոՊրոՄայնինգը» ՀՀ Կառավարությանը և ուժային կառույցներին կոչ է անում կանգնել ի պաշտպանություն պետության և օտարերկրյա ներդրողների շահերի, որոնք տեղերում սոցիալական ծրագրեր են իրականացնում։
Ընկերությունը պետության կողմից աջակցության հույս է հայտնում, ակնկալելով, որ Հայաստանում «ԳեոՊրոՄայնինգ» ընկերությունների խմբի արդյունաբերական ձեռնարկությունների կայուն, առանց խոչընդոտների աշխատանքը ապահովելու համար միջոցներ կձեռնարկվեն։ -0-
