«Գեներալ Մանվել Գրիգորյան» բարեգործական հիմնադրամին տարբեր չափերի գումարներ են հատկացվել

ԵՐԵՎԱՆ, 20 հունիսի. /Նովոստի-Արմենիա/. Նոր տեղեկություններ են ի հայտ գալիս ԵԿՄ նախագահ Մանվել Գրիգորյանի վերաբերյալ քննվող քրեական գործով:

Ինչպես հայտնում է Հայաստանի հատուկ քննչական կոմիտեի մամուլի ծառայությունը, պարզվել է, որ 2013թ.-ի փետրվարի 12-ին Մանվել Գրիգորյանի կողմից ստեղծվել է «Գեներալ Մանվել Գրիգորյան» բարեգործական հիմնադրամը, որին տարբեր քաղաքացիներ և կազմակերպություններ ինչպես կանխիկ, այնպես էլ բանկային փոխանցման եղանակով հատկացրել են տարբեր չափերի գումարներ:


Քրեական գործով առկա են կասկածներ, որ հնարավոր է` նշված գումարները մուտք չեն եղել բարեգործական հիմնադրամ կամ հետագայում ծախսվել են ոչ նպատակային:

Ծառայությունից խնդրում են բոլոր այն քաղաքացիներին և կազմակերպություններին, որոնք կանխիկ կամ փոխանցումով գումարներ են հատկացրել նշված հիմնադրամին, դիմել ՀՀ հատուկ քննչական ծառայություն:

Նախաքննությունը շարունակվում է: -0-