ԵՐԵՎԱՆ, 16 հուլիսի. /Նովոստի–Արմենիա/. «Նովոստի–Արմենիա» գործակալությունը ներկայացնում է երկուշաբթի` հուլիսի 15–ի առավել ուշագրավ նորությունների իր տարբերակը։
- ՀՀ կրթության, գիտության, մշակույթի և սպորտի նախարար Արայիկ Հարությունյանը լավ լուր է հայտնել։ Ինչպես նշվում է նախարարի Facebook–յան էջում, ֆիզիկայի միջազգային օլիմպիադայում Հայաստանի թիմը նվաճել է միանգամից հինգ մեդալ` հինգ բրոնզ: «Այսինքն` թիմի բոլոր անդամները մեդալով են վերադառնում: Նախորդ տարի մեր թիմն ուներ մեկ արծաթ, մեկ բրոնզ, մեկ պատվոգիր: Հաջորդ տարի պետք է զարգացնել հաջողությունը և աշխատել մեդալի որակը բարձրացնելու համար: Կեցցե՛ն մեր թիմի անդամները», – նշվում է նախարարի գրառման մեջ:
- Ryanair և Wizz Air լոուքոսթերները նախատեսում են դուրս գալ հայկական շուկա: Այս մասին լրագրողների հետ հանդիպմանն ասաց Քաղավիացիայի կոմիտեի նախագահ Տաթևիկ Ռևազյանն` ամփոփելով պաշտոնավարման մեկ տարին: Նրա խոսքով, լոուքոսթեր ընկերություններն արդեն պատրաստակամություն են հայտնել 2020 թ.-ի ամռանից մտնել հայկական շուկա ինքնաթիռների գնման հետ կապված բոլոր խոչընդոտների և խնդիրների լուծման դեպքում։
- Նախօրեին ճանապարհային ոստիկանության ծառայությանն ուղղաթիռ է ներգրավվել, որից հայտնաբերվել են օրինախախտ վարորդներ։ Այս մասին հայտնում է ոստիկանության մամուլի ծառայությունը։
Ըստ հաղորդագրության, աննախադեպ ուժեղացված ծառայությունն իրականացվել է Երևան-Սևան ավտոճանապարհին:
«Այսօր դիմում եմ ներկայացրել երկու Սահակյանցների` իմ և Լ.Սահակյանցի (ով միության անդամ էր ավելի քան 30 տարի) անունից Հայաստանի ԿՄ–ից դուրս գալու վերաբերյալ։ Անհնարին և վիրավորական եմ համարում գտնվել միությունում Հ.Խաչատրյանի նախագահությամբ։ Մաղթում եմ, որ «ոսկե ծիրանը» շարունակի նեխել»,– գրել է նա իր Facebook–ում։
- Հայաստանում ոստիկանության աշխատակիցները հայտնաբերել են մի աղջկա, ով թրաֆիքինգի զոհ է դարձել Շիրակի մարզի ֆերմաներից մեկում։ Ինչպես հայտնում է ոստիկանության մամուլի ծառայությունը, աղջկան հնարավոր է դարձել հայտնաբերել ութամյա գերությունից փախչելուց հետո։«Տվյալների համաձայն, աղջիկը ենթարկվել է աշխատանքային շահագործման գյուղի բնակիչներից մեկի կողմից 2011 թվականից` արդեն 8 տարի։ Տղամարդը, պարբերաբար բռնության ենթարկելով նրան, պահել է գոմում և առանց վարձատրության աշխատացրել է»,– պատմում է ոստիկանության ծառայողը։ -0-
