Արմավիրի մարզպետի խորհրդականի սպանության գործով 1 անձ է ձերբակալվել

ԵՐԵՎԱՆ, 27 հուլիսի./Նովոստի–Արմենիա/. Բացահայտվել է Արմավիրի մարզպետի խորհրդական Մանուկ Սիմոնյանի սպանությունը, հայտնում է Հայաստանի քննչական կոմիտեի մամուլի ծառայությունը։

Ըստ հաղորդագրության, 1 անձ ձերբակալվել է:


2017 թվականի հուլիսի 25-ին՝ ժամը 23.30-ի սահմաններում, Արմավիրի մարզի Մյասնիկյան-Դալարիկ ճանապարհի 3-րդ կմ-ից դեպի աջ ընկած՝ մոտ 300 մ հեռավորությամբ գտնվող «Դալարիկի ձոր» կոչվող տարածքում, հայտնաբերվել էր 1965 թ. ծնված Մանուկ Սիմոնյանի դիակը՝ փաթաթված և կապկպված: Դեպքի առթիվ հարուցված քրեական գործով ձեռնարկված մեծածավալ քննչական և օպերատիվ-որոնողական համատեղ գործողությունների ընթացքում առաջ են քաշվել և ստուգվել մի շարք վարկածներ:

Ըստ աղբյուրի, փաստական տվյալներ են ձեռք բերվել սպանության շարժառիթի և ենթադրյալ հանցագործություն կատարած անձանց շրջանակի վերաբերյալ: Այլ մանրամասներ հրապարակման ենթակա չեն, հայտնում են կոմիտեից։ -0-