ԵՐԵՎԱՆ, 13 սեպտեմբերի. /Նովոստի–Արմենիա/. Պետական վերահսկողական ծառայության պետ Դավիթ Սանասարյանը Facebook—ի իր էջում գրել է, որ Հայաստանի Ազգային անվտանգության ծառայությունը մերժել է իր փաստաբանների` իր նկատմամբ քրեական հետապնդումը դադարեցնելու միջնորդությունը։
«ԱԱԾ քննիչը (իրականում՝ վերադասը) մերժեց իմ նկատմամբ քրեական հետապնդումը դադարեցնելու փաստաբաններիս հիմնավոր ու փաստարկված միջնորդությունը»,– գրել է նա։
Սանասարյանի խոսքով, միջնորդությունը մերժվել է անհիմն պատճառաբանություններով։
«Դրանցից մեկը հետևյալն է. իմ չորս վկաների վերաբերյալ ընդգծել են, որ նրանք իմ ենթականերն են եղել, ուստի նրանց վկայություններն արժանահավատ չեն, մինչդեռ Սամվել Ադյանը նույնպես իմ ենթական է եղել, բայց նրա կեղծ ցուցմունքը դիտարկել են արժանահավատ, քանի որ իմ դեմ է»,– պարզաբանել է Սանասարյանը։
Սանասարյանը նշել է, որ մի փոքր հույս ունի, որ «դատախազությունն ավելի խելամիտ կգտնվի և չի ստանձնի այս կեղծ մեղադրանքն առաջ տանելու պատասխանատվությունը»։
«Իրավական Հայաստանն այլընտրանք չունի»,– հավելել է նա։
Սանասարյանին ապրիլի 18–ին մեղադրանք է առաջադրվել Հայաստանի քրեական օրենսգրքի 308–րդ հոդվածի 1–ին մասով (Պաշտոնեական լիազորությունները չարաշահելը)։ Նրա պաշտոնավարումն այդ պաշտոնում ժամանակավոր դադարեցվել են։ Ինքը` Սանասարյանը, այս կապակցությամբ ասել է, որ իր վրա պարզապես «գործ են սարքում»։ Ազգային անվտանգության ծառայության ղեկավար Արթուր Վանեցյանը, սակայն, մեկնաբանելով նրա հայտարարությունը, հայտարարել է, որ Սանասարյանին առաջադրված մեղադրանքներն այս պահին ամբողջությամբ հիմնավոր են:–0–
Ծանոթացեք լուրերին առաջինն ու քննարկեք դրանք մեր Telegram-յան ալիքում
