ԵՐԵՎԱՆ, 12 մարտի. /Նովոստի–Արմենիա/. Նախօրեին վարչապետ Նիկոլ Փաշինյանը մեկնել է Արցախ, որտեղ երեքշաբթի կկայանա Ազգային անվտանգության խորհրդի արտահերթ նիստ, որին մասնակցելու է նաև Լեռնային Ղարաբաղի ղեկավարությունը։
Ինչպես գրում է «Ժողովուրդ» թերթը, ակնհայտ է, որ նման շտապ միջոցառման անհրաժեշտություն է առաջացել ԵԱՀԿ Մինսկի խմբի վերջին հայտարարությունից հետո։
Մարտի 9–ին ԵԱՀԿ Մինսկի խմբի համանախագահները հանդես են եկել հայտարարությամբ, որում կոչ են արել զերծ մնալ միակողմանի կարգով առանց մյուս կողմի համաձայնության բանակցությունների ձևաչափը փոխելու պահանջից ։ Մարտի 6–ին Ադրբեջանի ԱԳՆ–ն հայտարարել էր առանց ԵԱՀԿ մասնակից պետությունների կոնսենսուսի 1992 թվականին Հելսինկյան որոշմամբ հաստատված բանակցային գործընթացի ձևաչափը փոխելու անհնարինության մասին։
Ինչպես նշում է պաշտոնական Բաքուն, «այդ որոշման հիման վրա Հայաստանը և Ադրբեջանը հանդես են գալիս որպես հակամարտության կողմեր, իսկ Լեռնային Ղարաբաղի հայ և ադրբեջանական համայնքները` որպես շահագրգիռ կողմեր»։
Պարբերականը գրում է, որ այդ հայտարարությունից հետո Հայաստանի ղեկավարությունը հայտնվել է, ըստ էության, փակուղային վիճակում։
«Մի կողմից՝ Նիկոլ Փաշինյանը չի կարող հրաժարվել Արցախը բանակցային գործընթաց վերադարձնելու իր իսկ հայտարարությունից, մյուս կողմից՝ չի կարող ուղղակի մասնակցել բանակցությունների, որոնց ընթացքում չի քննարկվելու Արցախի մասնակցության հարցը»,– ասվում է գրառման մեջ։
Այս հարցերը, ըստ պարբերականի, ստիպել են Նիկոլ Փաշինյանին Անվտանգության խորհրդի արտագնա նիստ անցկացնել Արցախում։
«Մյուս կողմից՝ պետք չէ բացառել, որ սա փորձ է Ալիևի հետ հանդիպումից առաջ որոշակի տպավորություն թողնելու, որ Արցախն անուղղակիորեն մասնակցում է բանակցային գործընթացին, և այդպիսով հիմնավորելու Ալիևի հետ հանդիպումը»,-գրում է թերթը: -0-
Ծանոթացեք լուրերին առաջինն ու քննարկեք դրանք մեր Telegram-յան ալիքում
