ԱԱԾ ղեկավար. հայտնի է, թե որտեղ է թաքնվում Սերժ Սարգսյանի եղբայրը

ԵՐԵՎԱՆ, 21 փետրվարի./Նովոստի–Արմենիա/. Հայաստանի ազգային անվտանգության ծառայությունը գիտի, թե որտեղ է թաքնվում նախկին նախագահ Սերժ Սարգսյանի եղբայր Լևոն Սարգսյանը։ Այդ մասին հինգշաբթի կառավարության նիստից հետո ասաց ԱԱԾ ղեկավար Արթուր Վանեցյանը։ Նա հայտնեց, որ խոսքն արաբական երկրներից մեկի մասին է։

Ավելի վաղ Լևոն Սարգսյանի դեմ քրեական գործ է հարուցվել անօրինական հարստացման և հայտարարագրման ենթակա գույքը թաքցնելու փաստով։ Հուլիսի 7–ին առաջին ատյանի դատարանը Սարգսյանի նկատմամբ խափանման միջոց է ընտրել կալանավորումը, նրա նկատմամբ հայտարարվել է հետախուզում։


«Գիտենք, թե որտեղ է նա, պետք են արտահանձնման մեխանիզմներ։ Այդքան էլ հեշտ չէ մարդուն վերադարձնել այլ երկրից»,– ասաց նա` նշելով այլ երկրների իրավապահ մարմինների կողմից գործակցության ցանկության բացակայությունը։

վանեցյանի խոսքով, կասկածյալները կարող են դիմել այլ երկրում փախստականի կարգավիճակ, քաղաքական ապաստան, քաղաքացիություն ստանալու համար և նույնիսկ բողոքարկել արտահանձնման որոշումը` ձգձգելու համար գործընթացը։ -0-