ԵՐԵՎԱՆ, 14 փետրվարի./Նովոստի–Արմենիա/. Երևանի քաղաքապետարանը Facebook–յան պաշտոնական էջում պարզաբանել է առավոտվա «ավտոբուսային» խնդիրը։
Այսօր առավոտյան Երևանի ավտոբուսային կանգառներում, մասնավորապես Ավանում և Մասիվում, հավաքվել էին տասնյակ մարդիկ, ովքեր չէին կարողանում հասնել քաղաքի կենտրոն։ Քաղաքացիները փորձում էին տաքսի կանգնեցնել, սակայն ոչ բոլորին էր հաջողվում։ Facebook–յան օգտատերերը հայտնում էին, որ Ավանից քաղաք իջնող ոչ մի երթուղային ավտոբուս չի աշխատում։
Ինչպես հայտնում են քաղաքապետարանից, Երևանի քաղաքապետ Հայկ Մարությանը նախօրեին «Երևանի ավտոբուս» ՓԲԸ-ի աշխատակազմին է ներկայացրել ընկերության պետի ժամանակավոր պաշտոնակատար Ռուբեն Սարգսյանին: Ընկերությունը 19 երթուղի է սպասարկում շուրջ 180 ավտոբուսով:
Բացի այդ, ընկերության հավաքակայանում շուրջ 70 չօգտագործված ավտոբուս կա: Դրանք քաղաքապետի հանձնարարությամբ առաջիկայում գիծ դուրս կբերվեն՝ համալրելով քաղաքապետարանի կողմից սպասարկվող երթուղիների ցանկը: Մինչև մայրաքաղաքի նոր տրանսպորտային համակարգի ամբողջական ներդրումը, մինջանկյալ նոր երթուղիներ ու շարժակազմ կներգրավվի:
«Երթուղիների ավելացմանն ու ընկերության գործառույթների ընդլայմանը զուգահեռ, «Երևան ավտոբուս»-ում տեղի կունենան փոփոխություններ, մասնավորապես, տեխնոլգիական վերազինման և նոր աշխատակիցների ներգրավման առումով», – հայտնում են քաղաքապետարանից։
Ընկերությունում նախատեսվող փոփոխությունները, մասնավորապես, տնօրենի փոփոխությունը մտավախություն է առաջացրել որոշ վարորդների մոտ, որ դրանց հետևանքով կվատթարանան նրանց աշխատանքային պայմանները:
Հայկ Մարությանը վստահեցրել է աշխատակիցներին, որ կրճատումներ ու կադրային փոփոխություններ ընկերությունում չեն լինելու, աշխատանքի պայմանները ոչ միայն չեն վատթարանալու, այլեւ հակառակը՝ սպասվում են բարելավումներ կանոնավոր աշխատաժամանակի եւ վարձատրության մասով:
«Այնուհանդերձ, այսօր առավոտյան ընկերության մի քանի վարորդներ հրաժարվել են դուրս գալ երթուղի՝ պահանջելով նախկին տնօրենի վերադարձը: Ժամը 9.00-ի դրությամբ , սակայն, երթուղիների կանոնավոր աշխատանքը վերականգնվել է», – նշել են Երևանի քաղաքապետարանից։–0–
