ԵՐԵՎԱՆ, 6 օգոստոսի./Նովոստի–Արմենիա/. «Երևանի պաշտպանության ճակատ» նախաձեռնության համակարգող Բաբկեն Հարությունյանը երեքշաբթի Երևանի քաղաքապետարանի մուտքի մոտ կայացած ասուլիսի ժամանակ մեղադրել է քաղաքապետարանին անպատասխանատվության և նախընտրական խոստումները չկատարելու մեջ։
«Ես ուսումնասիրել եմ քաղաքապետ Հայկ Մարությանի նախընտրական խոստումները, պատրաստել եմ ցանկ, որը բաղկացած է 21 հարցից։ Պատասխանները ստանալուց հետո կամփոփեմ տարվա տվյալները, որի ընթացքում քաղաքապետի պաշտոնը զբաղեցրել է Մարությանը։ Օրինակ խոստացվել է, որ մշակվելու է քաղաքի զարգացման ռազմավարություն։ Անցել է 10 ամիս, սակայն ոչինչ չի արվել», – ասաց նա։
Հարությունյանը հայտարարեց, որ քանի որ քաղաքապետն «իրավիճակային կառավարիչ է», ամբողջ քաղաքում գրանցվում են աղբահանության, վերելակների և այլնի հետ կապված խնդիրներ։
Загружается новость ... "Лево"
Նա նաև նշեց, որ դիմել է քաղաքապետարանին` խնդրելով, որպեսզի նրանք տրամադրեն աղբահանության հարցով Sanitek ընկերության հետ ստորագրված պայմանագրերի փաստաթղթային տարբերակը, սակայն այդ խնդրանքը մինչև հիմա չի բավարարվել։
«Քաղաքապետը պարտավոր է լուծել մեզ բոլորիս հուզող հարցերը։ Նա չի կարող լուծել դրանք և անընդհատ մեղադրում է Sanitek–ին։ Եթե այդպես է, եկեք հասկանանք, թե որոնք են Sanitek–ի խնդիրները, ինչի պատճառով ընկերությունը չի կատարում իր պարտականությունները և այլն։ Այդ դեպքում այլ հարց է ծագում. ինչու՞ մինչև հիմա քաղաքապետարանը չի լուծել պայմանագիրն ընկերության հետ», – նշեց Հարությունյանը։
Նրա խոսքով, քաղաքապետարանը չի ուզում պատասխանել այս հարցերին։ Միաժամանակ Հարությունյանը նշեց, որ դրա համար պատասխանատու են քաղաքապետարանն ու անձամբ Մարությանը։
Համակարգողն ուշադրություն դարձրեց այն փաստին, որ քաղաքապետի կողմից բարձրաձայնած բազմաթիվ շինարարական աշխատանքներն ու նախագծերը, որոնք ուղղված են քաղաքի կանաչապատմանը, դեռևս սկսված չեն, չնայած «խոստացվել էր, որ այսօր–վաղն արդեն սկսում են»։
«Եթե քաղաքապետարանն այս անգամ ևս հրաժարվի պատասխանել, ապա դա կվկայի այն մասին, որ Մարությանը չի կարողացել կատարել իր նախընտրական խոստումները։ Ես կսկսեմ դիտարկել խնդրի իրավական լուծման ուղիները», – ասաց նա։
Միաժամանակ Հարությունյանը հայտարարեց, որ քաղաքապետարանը մինչև հիմա էյֆորիայի մեջ է և կարծում է, որ իր ամեն քայլը կդիմավորեն ծափահարություններով։
«Ուզում եմ, որ արձանագրեք քաղաքապետարանի ոչ թափանցիկ և այս դեպքում անպատասխանատու աշխատանքը և կոչ եմ անում, որպեսզի այդ մարդիկ սթափվեն», – ասաց նա։–0–